Në debatin për ngjarjen e 21 janarit në emisionin Open, analisti Andi Bushati ka vendosur në pozicion të vështirë Taulant Ballën, duke i thënë se: ju shfrytëzuat viktimat, të vrarët, gjakun e tyre, dhe erdhët në pushtet.
Bushati përmendi si argument, që gardistin Agron Malaj, me rol të rëndësishëm në 21 janar, 10 vite më parë, Edi Rama e shpërbleu, e promovoi duke e bërë Kryetar Bashkie të Matit.
Për më shumë, siç nuk është përmendur më parë, Bushati tha se gardisti Malaj, u shpërblye nga Berisha me honorar, mori paratë pas ngjarjes si shumë efektivë të tjerë, ndërkohë që nga Edi Rama u shpërblye akoma më shumë.
Taulant Balla u mbrojt me argumentin e vjetër të Ramës, që Malaj kishte qënë informator i tyre, u kishte treguar se çfarë ka ndodhur nga brenda. Madje, Balla, zbuloi për herë të parë, se pikërisht ai vetë ka qënë personi i kontaktit me atë që ishte shefi i grupit të snajperëve, që sot, me rilindjen është Kryetar i Bashkisë së Matit.
Ndërsa për argumentin e koalicionit me Ilir Metën 2 vite më pas, Balla u shpreh se ai ishte një problem nga ana morale, por këtë PS dhe Edi Rama e bënë për të rrëzuar nga pushteti, armikun Sali Berisha.
