Ish-ministri, Ditmir Bushati ka bërë një analizë të detajuar të mënyrës së të bërit politik nga PS-ja, gjatë fjalës që mbajti në Kongres.
Ai ka këshilluar për të mos rënë në vetëkënaqësi, pasi kjo do të sillte rrudhjen e partisë. Nga ana tjetër, Bushati ngriti edhe shqetësimin për gjendjen e opozitës, pasi sipas tij politika nuk funksionon pa pasur alternativë tjetër.
“Kemi përgjegjësi ta bëjmë politikën më tërheqëse, politika bëhet tërheqëse kur ka aspirate të bazuara në vlera, të shërbejë si bashkim vlerash, por vetëm kur dihet destinacioni, mund të flitet për rrugën, na duhet angazhim rreth ideve politike, si busull për orientimin e veprimit politik. Duhet të mos biem në kurthin e vetëkënaqësisë që na çon në rrudhje. Po kështu situate e pazakontë që po përjeton opozita, duhet të na shqetësojë, se nuk funksionon politika, pa pasur alternativë tjetër. Për fatet e përbashkëta e atdheut, fjala kompromis, nuk duhet konsideruar si Pazar, me opozitën nuk kemi nevojë që të jemi të ndarë, por të ndryshëm, vetëm kështu do të mundet që trashëgimia jonë të krijojë politikanë të përgjegjshëm. Vetëm kështu do të qeverisim pa sunduar, për një Shqipëri ku ia vlen të jetosh. Ukraina, paqja, liria dhe sovraniteti janë në agresion. Tashmë ne jemi spirancë e stabilitetit, duhet të jemi krenar për vendin dhe të kemi më shumë besim te vetja, po përkujdesemi që pasojat nga lufta të jenë sa më pak të ndjeshme, tërmeti dhe pandemia na ridimensionuar marrëdhëniet me qytetarët”, tha Bushati.
