Ndonëse kishte përballë Luftëtarin që është me një këmbë në Kategorinë e parë, Bylisi nuk ia doli të marrë fitoren e parë për vitin 2020 në kampionat, pasi nuk shkoi më shumë se një barazim 1-1 në transfertën gjirokastrite.
Trajneri Dovedan kishte lënë në stol portierin Isli Hidi, pas gabimeve në javët e fundit dhe i kishte besuar nga minuta e parë Mirakës, ndërsa mallakastriotët kaluan të parët në avantazh në minutën e 35-të me anë të sulmuesit Guindo, që ekzekutoi saktë një 11-metërsh.
Megjithatë gjirokastritët rikthyen baraspeshën shumë shpejt, me anë të Gresild Likës, që mposhti Mirakën dy minuta para sinjalizimit për fundin e pjesës së parë dhe çoi skuadrat në dhomat e zhveshjes në barazim.
Pjesën e dytë Bylisi provoi të gjitha kartat për të gjetur golin e fitores, por më pranë marrjes së tre pikëve ishte Luftëtari, që krijoi një mori rastesh me anë të kundërsulmeve, ndonëse mungesa e eksperiencës bëri që të gabonin në finalizim.
Pati vend edhe për tension në minutat shtesë, pasi vendasit pretenduan për një 11-metërsh, pasi sulmuesi i Luftëtarit arriti të kalojë topin ndaj portierit Miraka dhe më pas u ndal me një ndërhyrje të gabuar nga ky i fundit, por nuk pati të njëjtin mendim arbitri kryesor.
Edhe skuadra e vendit të fundit, Flamurtari bëri surprizë sot, pasi mori një barazim me shumë vlera në transfertën durrsake ndaj Teutës. Në “Niko Dovana” vlonjatët kaluan të parët në avantazh me golin e Anxhelo Harunit, ndërsa Teuta riktheu baraspeshën vetëm në pjesën e dytë.
Durrsakët vinin në një moment mjaft të mirë, pas fitores me partizanin në kryeqytet dhe pritej që sot të regjistronin një tjetër sukses, por Flamurtari nuk rezultoi aspak një provë e lehtë.
