Ukrainasit kanë nënshkruar një peticion, ku këkrojnë legalizimin e martesave të të njëjtit seks. Peticioni ka më shumë se 27,900 nënshkrime, të mjaftueshme për t’u marrë në shqyrtim nga presidenti Volodymyr Zelensky, i cili ka 10 ditë për t’u përgjigjur.
Homoseksualiteti nuk është i paligjshëm në Ukrainë, por martesat e të njëjtit seks dhe partneritetet civile nuk njihen. Kjo ka shkaktuar probleme të veçanta për personat LGBT që regjistrohen në ushtri, pas pushtimit të Rusisë.
Sipas ligjit ukrainas, nëse dikush në një marrëdhënie të të njëjtit seks vdes, partneri i tyre nuk mund t’ia marrë trupin ose ta varrosë. Peticioni online thotë: “Në këtë kohë, çdo ditë mund të jetë e fundit”.
Një organizatë LGBT e ka cilësuar peticionin si një “moment të rëndësishëm” për anëtarët e komunitetit.
“Është e rëndësishme që personat LGBTQ të kenë të drejtën të shohin partnerin e tyre dhe të marrin trupin e tyre nga morgu dhe të kërkojnë kompensim nëse është e nevojshme”, tha për BBC Oksana Solonska, menaxhere e komunikimit me media në Kyiv Pride.
“Të gjitha çiftet e martuara i kanë këto të drejta. Ne vërtet shpresojmë që martesat e të njëjtit seks do të legalizohen, kështu që njerëzit do të jenë në gjendje të kujdesen për njëri-tjetrin,” shtoi ajo.
Nuk dihet ende nëse Zelensky do të pranojë të legalizojë martesat e të njëjtit seks.
Sipas një sondazhi të kryer nga Instituti Ndërkombëtar i Sociologjisë së Kievit në maj, gjatë gjashtë viteve të fundit, numri i njerëzve që kanë një “pikëpamje negative” për komunitetin LGBT është ulur nga 60.4% në 38.2%.
Rreth 12% e njerëzve kanë një qëndrim pozitiv nga 3% dhe rreth 44% thanë se ishin indiferentë.
