Ambasada Amerikane ka pasur sot një qendrim shumë të fortë lidhur me zgjedhjet që po vijnë. Ajo është shprehur se do të veprojë ndaj atyre që do të nxisin dhunë, ose do të dëmtojnë votën dhe procesin. Po ashtu, ka thënë se përgjegjësit kryesorë për mbarëvajtjen elektorale janë zyrtarët në pushtet.
Prej shumë muajsh ambasada amerikane po këmbëngul që partitë politike të mbajnë larg listave të kandidatëve personat me rekorde kriminale dhe korruptive.
Në deklarata është përmendur emri i Tom Doshit, dhe zonja Kim e Ambasada kanë kërkuar që institucionet të pengojnë hyrjen e tij në parlamentin e ri.
I pyetur për këtë, kryetari i Komisionit Qendror Zgjedhor, Ilirjan Celibashi, deklaroi në konferencën e sotme të shtypit se e ka dërguar për verifikim emrin e Doshit në institucionet përkatëse.
“Në rastin e zotit Doshi, KQZ ka marrë shtysën nga të dhëna publike, që e nxitin t’i kërkojë prokurorisë informacione të tjera, veç atyre që ai ka dhënë në formularin e vetëdeklarimin, për të bërë vlerësim më të plotë mbi përputhshmërinë e kandidimit të tij për deputet. Por edhe në formularin e vetëdeklarimit ka të dhëna që shërbejnë si indicie për KQZ-në, për të kërkuar hetim të thelluar për kandidatin”-tha Celibashi.
Ai shtoi se bashkë me zotin Doshi, KQZ ka kërkuar hetime të thelluara për 28 kandidatë për deputetë: 5 nga Aleanca ABEKO, 2 nga Bindja Demokratike, 2 nga Lëvizja për Ndryshim, 1 nga Lëvizja e Re, 6 nga LSI, 2 nga Nisma Thurrje, 4 nga Partia Demokratike, 3 nga Partia Socialiste dhe 3 nga Partia Social-Demokrate.