Red Varaku
Agresioni rus në Ukrainë ka sjellë dhe një unifikim të qëndrimit të SHBA-BE në lidhje me zhvillimet në Ballkanin Perëndimor.
Gjithashtu, kjo ka prodhuar një vullnet të hekurt dhe një shpejtësi tjetër në lidhje projektin për integrimin e rajonit ne Bashkimin Europian, çka është dhe objektivi kryesor i projektit Amerikan për Ballkanin Perëndimor.
Siç është bërë e qartë, ky projekt synon ta kthejë këtë rajon nga një rajon problematik, “një fuçi baruti” që mund të hedhë në erë nga momenti në moment rendin aktual botëror, në një hapësirë të zhvilluar nga të gjitha pikëpamjet që do kontribuonte në paqen dhe stabilitetin.
Kështu këtë të premte me shumë gjasa ambasadorët e 27 vendeve të BE pritet të firmosin hapjen e negociatave me Shqipërinë dhe Maqedoninë e Veriut dhe njëkohësisht sta pritet të vendosin dhe datën për takimin e parë ndërqeveritar që lidhet me fillimin e hapjes së kapitujve.
Ndërkohë po diskutohet liberalizimi i vizave me Kosovën në tetor, ku vullneti duket se nuk po mungon përfshi dhe vetë bllokuesen kryesore të deritanishme të këtij procesi, Francën, e cila tani shikon si problematika vetëm disa çështje teknike, siç janë çështjet e karakterit të sigurisë apo çështje të azilkërkuesve për të cilat ajo konsideron se duhet të merren masat përkatëse.
Ndërsa me reformat kushtetuese që po ndërmerren nga Bosnjë-Hercegovina pritet që po në tetor të këtij viti të vendoset në tavolinë dhe vendimi për marrjen e statusit të vendit kandidat për Bosnjë-Hercegovinën, çka është dhe fillimi i fundit të problemeve për Bosnjë-Hercegovinën.
Të gjitha këto të paralajmëruara nga Presidenca e shkuar franceze dhe të konfirmuara nga Presidenca aktuale çeke.
Pa llogaritur këtu dhe vullnetin e shpallur të Kosovës dhe Bosnjë-Hercegovinës për t’iu bashkuar aleancës më të fuqishme ushtarake në glob, NATO, që nëse bëhet realitet e kthen të gjithë rajonin në anëtare te plotë të NATO-s përveç Serbisë.
Pra, është e qartë që në kontekstin e ri gjeopolitik gjërat po lëvizin me një shpejtësi tjetër për integrimin e rajonit në BE , si një nga hapësirat më demokratike të Perëndimit. Vullneti politik i Perëndimit për integrimin e tij është më i vendosur se kurrë, ndërkohë të vetmet pengesa duket se janë vetëm ato teknike dhe ky është vërtetë një lajm i mirë për rajonin.
Kjo jo vetëm sepse këto janë kapërcime të jashtëzakonshme si në kuptimin e reformave që duhen ndërmarrë dhe kohës që merr zakonisht ky proces, por edhe sepse afërsia me BE prodhon pashmangshmërisht më shumë demokraci, shtet të së drejtës dhe mirëqenie.
