Policia italiane është vënë prej mbrëmjes së djeshme në kërkim të vrasësit të dy shqiptarëve, të cilët bashkëjetonin prej disa kohësh. Ngjarja e rëndë ndodhi mbrëmjen e djeshme, pak pas orës 21:00, ku u gjetën të pajetë burrë e grua, të cilët bashkëjetonin në një shtëpi në Spinea (Venecia).
Zbulimi i trupave është bërë nga policia, e lajmëruar nga vajza e gruas, e cila nuk kishte mundur të kontaktonte me nënën e saj që prej pasdites së djeshme. Fillimisht u mendua për një rast vrasje-vetëvrasjeje, por gjatë natës nga hetimet e para u zbulua se ishte një vrasje e dyfishtë.
Policia në fakt është vënë në kërkim të një personi të tretë, i dyshuar për krimin makabër. Të dy viktimat janë me origjinë shqiptare. Në vendin e ngjarjes, hetuesit gjetën një armë zjarri dhe një thikë. Dy bashkëjetuesit do të merrnin plagë vdekjeprurëse me thikë, çka do të thotë se janë sulmuar barbarisht.
Vrasësi, i cili sipas asaj që mësohet duhet të ishte ish-bashkëshorti i gruas, gjithashtu shqiptar, pas krimit është arratisur me makinë. Hipotezë kryesore besohet se ka qenë pamundësia e burrit për të pranuar marrëdhënien e re të bashkëshortit. Ndërkohë mjekësia ligjore ka shkuar menjëherë në shtëpinë ku ndodhi tragjedia, duke kërkuar të dhëna të dobishme për të përshkruar konturet e një historie ende për t’u sqaruar. Policia ka shtrirë kontrollet edhe në disa shtëpi fqinje: ka gjasa, në fakt, që viktimat të kenë tentuar të strehohen te fqinjët e tyre para se të vriteshin.