Zv/Ministrja e Turizmit dhe Mjedisit, Ornela Çuçi, nuk kurseu komentet e saj rreth çmimeve abuzuese në jug gjatë sezonit turistik veror.
Çuçi thotë për emisionin “Ora Verore” se sigurisht që ka biznese, që abuzojnë me çmimet, duke nënvizuar se “Shqipëria ka plot opsione dhe oferta, nga çmimet më të lira deri te tek çmimet e shtrenjta”.
Zv/Ministrja shprehet se “secili prej pushuesve është i lirë të zgjedh se në cilin hotel apo restorant të shkojë, në varësi të gjendjes ekonomike që ka”.
Ronaldo Sharka: Njerëzit çojnë shpesh te JOQ (media online) fatura, për tu ankuar rreth çmimeve të shtrenjta. Vazhdon të jetë një mit legjendar, apo vazhdon të jetë problem?
Ornela Çuçi: Ti Ronaldo, unë edhe Feridja jemi të lirë të shkojmë, ose mos shkojmë në një restorant. Nuk na thotë njeri, që ti duhet të shkosh me patjetër aty, ku zotëria në fjalë abuzon me faturën dhe me çmimin. Është një sektor i sapolindur, është një sektor që tani ka hedhur bazat e vërteta.
Secili prej bizneseve dhe individëve që i drejtojnë këto biznese, do të duhet të mendojnë për nesër. Por ti je i lirë që të shkosh aty ku fatura të shkon 250 euro nata, siç je i lirë të shkosh dhe aty ku fatura të shkon 15 euro nata. Dhe Shqipëria i ofron të gjitha këto. Pra mos të futemi te legjendat urbane, që ka fatura jashtë parametrave.
Ronaldo Sharka: Unë vjet në Ora Verore, kisha mundësi të haja në vend te të shtrenjta, por kisha mundësi të shkoja edhe në restorante të lira nëpër fshatra.
Ornela Çuçi: Në fakt këtu duhet të falënderojmë dhe mediat me të gjitha emisionet që bëjnë. Mediat reklamojnë edhe atë që e ka faturën e lirë edhe atë që e ka faturën e shtrenjtë.
Ronaldo Sharka: Ka shteti akses për të kontrolluar një biznes, që unë mos ta pi birrën në jug 14 mijë lekë të vjetra? E kam pirë para dy javësh…
Ornela Çuçi: Edhe unë do doja që për çdo problemin tim të hap dritaren, t’i drejtohem qeverisë dhe ta shaj. Do doja shumë ta bëja këtë gjë, gjatë gjithë kohës. Por jo gjithçka varet nga shteti. Qytetarët duhet patjetër ta kuptojnë këtë. Fatmirësisht Shqipëria ofron shumëllojshmëri çmimesh.