Edhe në këtë edicion të tetë të Çmimit Letrar Kadare nuk kanë munguar emrat e autorëve të njohur, por risi për jurinë kanë qenë prurjet e të rinjve, të cilët kanë dominuar edhe në përzgjedhjen e dhjetëshes finaliste, që do të pretendojë për të fituar çmimin e madh prej 10 mijë euro.
Juria e këtij viti, e përbërë nga poetja Natasha Lako, shkrimtari e gazetari Alfred Peza, gazetari nga Shkupi Nazim Rashidi, pedagogët Ermir Nika dhe Irena Myzeqari, u mblodh dje për të përzgjedhur 10 më të mirët mes 27 dorëshkrimeve garuese.
Për fazën e dytë të Çmimit Kadare u përzgjodhën Grigor Banushi me “Gjenerali pa yll”, Leonard Veizi me “Ted B”, Tobias Xhaxhiu me “Imun”, Flogerta Krypi me “Rënja”, Klidi Apostoli me “I abortuari”, Majlinda Rama me veprën “Të lirë e të poshtëruar”, Nurie Emrullai “Duhet të jetë dashuri”, Piro Loli me “Avokati i Diktatorit”, Suad Arilla me “Rikthim në vendet e panjohura” dhe Afërdita Blaka me “Në pritje të yllit të Mëngjesit”.
Autorët finalistë do të dorëzojnë brenda datës 10 shkurt veprën e plotë, pasi në fazën e parë ata dorëzuan dorëshkrimet deri në 25 faqe.
Çmimi Kadare vijon t’i mbetet besnik idesë së promovimit të prozës shqipe, duke ruajtur si kriter për konkurruesit zhanret në prozë, si romane, novela e tregime.
Juria e Çmimit Kadare zbulon se nga këta dhjetë të përzgjedhur, në fazën e fundit shkojnë pesë prej tyre, emrat e të cilëve do të shpallen më 17 shkurt, ndërsa më 26 të këtij muaji – në ditën e fundit të Shkollës Dimërore të Humaniteteve, që mbahet në Llogora-, do të dalë edhe emri i fituesit të edicionit të tetë të Çmimit Kadare,
Autori apo autorja fituese, përveç vlerës monetare prej 10 mijë eurosh, që e bën Çmimin Kadare ndër më prestigjiozët në hapësirën shqipfolëse, do të shohë të botuar veprën, përmes logos së shtëpisë botuese universitare UET PRESS dhe do të nisë një tur promovimi në të gjithë vendin.
Jo vetëm autorët e Çmimit Letrar Kadare, që në këtë dekadë të parë kanë qenë nga e gjithë hapësira shqipfolëse, por UET PRESS e ka një prej shtyllave të politikave botuese mbështetjen dhe promovimin e letërsisë shqipe.
Edicionin e kaluar, fituese u shpall shkrimtarja e njohur Vera Bekteshi me romanin “Pusulla të Verdha”. Të tjerë fitues të shquar të Çmimit Kadare kanë qenë Gani Mehmetaj dhe Musa Ramadani, nga Kosova, Rudolf Marku, Virgjil Muçi, Shkëlqim Çela e Loer Kume. Përgjatë viteve, në këtë konkurs kanë garuar edhe emra të tjerë të njohur si poetja Mimoza Ahmeti, shkrimtarët Zija Çela e Bardhyl Londo, publicisti Mustafa Nano, poeti Primo Shllaku, Ylljet Aliçka, Gazmend Krasniqi e shumë të tjerë.
