Disa ditë më parë, kryetarja e Komitetit Teknik të Ekspertëve, Mira Rakacolli, u shpreh në lidhje me situatën pandemike se, përdorimi i urbanëve është një problem personal, dhe se qytetarët mundësisht të zgjohen sa më herët në mëngjes.
Sot, Rakacolli ka ndjerë nevojën për të dhënë një sqarim.
E ftuar në “A2”, Rakacolli tha se deklarata e saj është keqinterpretuar, por i qëndron mendimit për të mos hipur në autobusë kur janë të ngarkuar.
“Ka ndodhur një keqkuptim dhe keqinterpretim për atë që jam shprehur, se situata në autobusë është e ngarkuar, se është vend ku mund të merret infeksioni, dhe përgjigja ime i është drejtuar qytetarëve dhe nuk është thënë përgjigja tjetër , që nëse e shihni që autobusi është plot, mos hipni, se ju infektoni familjarët…Por jo se nuk duhen shtuar kontrollet në autobusë.
Ka qenë një këshillë praktike dhe është thënë qartazi, dhe janë përcaktuar protokollet që ky transport të mos bëhet vatër infeksioni, dhe jo çdo gjë të bazohet te protokollet. Ajo që më bën përshtypje është që fokusohemi te përgjigjet negative dhe jo te mesazhi.
Kur e shohin që autobusët janë të ngarkuar të mos hipin, pavarësisht masave që ne marrim. Ndoshta me të drejtë është keqinterpretuar. Patjetër që duhet vëmendje e shtuar dhe nuk duhet të pranojnë të hipin të tjerë. Duhen më shumë kontrolle masa ndëshkuese edhe për operatorët. Është e pamundur që fizikisht që në çdo orar dhe autobus të çosh nga një kontrollor”, – tha Rakacolli.