Hyrja për në Tiranë dhe qarkullimi i automjeteve brenda kryeqytetit do jetë e bllokuar të mërkurën, kur në ‘Air Albania’ do të luhet finalja e Conference League.
Ministri i Brendshëm, Bledi Çuçi në një deklaratë për mediat u bëri thirrje qytetarëve nga rrethet të shmangin hyrjen në kryeqytet të mërkurën, nëse nuk kanë një biletë për ndeshjen.
Çuçi sqaroi se për ata që duan të dalin nga Tirana kjo gjë do t’ju mundësohet përmes korridoreve të daljes.
Ministri u bëri thirrje bizneseve private dhe bankave që ta bëjnë pushim më 25 maj. Ndërkohë, për administratën, përfshirë shkollat dhe kopshtet, e mërkura është shpallur zyrtarisht ditë pushimi.
“Bizneset e shërbimit, bankat apo zyrat e ndryshme private që ashtu siç ne e kemi bërë me institucionet publike apo shkollat, ta shpallin ditë pushimi ditën e mërkurë pasi do jetë e paralizuar për sa i përket qarkullimit, e gjithë Tirana. Në Tiranë mos hajdeni nëse nuk keni biletë, mos hajdeni ditën e mërkurë në Tiranë sepse sepse do jetë e bllokuar. Në Tiranë do qarkullojnë ata që kanë një biletë si dhe tiransit në zonë pedonale e gjitha. Unë i dekurajoj të gjithë shqiptarët e tjerë që ditën e mërkurë të mos tentojnë të vijnë në Tiranë sepse Tirana do jetë në dispozicion të miqve nga Rotterdami e Roma dhe atyre që kanë një biletë dhe duan të vijnë të shijojnë ndeshjen”, tha ministri.
Finalja e Conference League, kompeticionit të UEFA-s, pritet të sjellë deri në 90 mijë tifozë që do të vijnë nga Italia dhe Holanda.
Policia e Shtetit ka marrë një sërë masash, mes të cilave edhe bllokimi i disa akseve rrugore në kryeqytet ditën e zhvillimit të ndeshjes. Qytetarët që bëjnë veprime të dhunshme gjatë ndeshjes do të gjobiten apo dënohen.
