Ka reaguar kompania britaniko-suede AstraZeneca për vendimin e autoriteteve daneze për të refuzuar vaksinën e saj, pas rasteve të raportuara për efekte negative anësore si mpiksje gjaku.
Në një deklaratë për agjencinë e lajmeve Reuters, AstraZeneca tha se e respekton vendimin e agjencisë shëndetësore në Danimarkë, ndërsa shtoi se çdo shtet e ka vetë në dorë për të zgjedhur dhe vendosur në lidhje me programin e vaksinimit.
“Ne e pranojmë dhe e respektojmë vendimin e marrë nga Sundhedsstyrelsen (agjencia e shëndetit) në Danimarkë”, – u shpreh kompania.
“Ne do të vazhdojmë të bashkëpunojmë me rregullatorët dhe autoritetet lokale në mënyrë që të sigurojmë të gjitha të dhënat në dispozicion për të informuar në kuadër të vendimeve”, – vijoi ajo.
Danimarka është shteti i parë në botë që ndalon plotësisht vaksinimin me dozat e AstraZeneca-s. Shteti nordik do të vazhdojë fushatën e imunizimit duke përdorur vaksinat Pfizer/ BionTech dhe Moderna.
Më shumë se një duzinë vendesh ndoqën rrugën e pezullimit, por shumica rifilloi përdorimin e AstraZeneca-s pasi Agjencia Europiane e Barnave (EMA) theksoi përftimet e vaksinës, duke e gjykuar atë “të sigurt dhe efektiv”.
Etiketa: Astrazeneca, Danimarka, Pandemia COVID-19
