Kreu i grupit parlamentar të Partisë Demokratike Alfred Rushaj, reagoi pasi opozita braktisi seancën e Kuvendit, ku sipas tij u shkel me të dyja këmbët rregullorja.
Rushaj tha se në asnjë mënyrë nuk do të zvogëlohet hapësira e përfaqësimit të opozitës në Kuvend dhe në Komisione Parlamentare.
“Sot duhej të ishte një seancë rutinë, normale e kuvendit, ku secila prej forcave politike duhej të zinte vendin e vet në komisionet parlamentare për të bërë detyrën e vet në këtë Kuvend. Për fat të keq, që në seancën e parë me të dyja këmbët u shkel rregullorja. Dhe u shkel për çfarë? U shkel rregullorja për të zvogëluar hapësirën e përfaqësimit të opozitës së Kuvend.
Kjo është e papranueshme, kjo është diçka që nuk duhet ta bëjë askush. Prandaj i bëjmë thirrje së pari kryetares së Kuvendit, së dyti grupit parlamentar të Partisë Socialiste që të zbatojnë rregulloren.
Nuk mundet që në asnjë mënyrë të zvogëlojnë hapësirën e përfaqësimit të opozitës në Kuvend. Nuk mundet dhe nuk do ta bëjnë që të zvogëlojnë zërin e opozitës në Komisionet Parlamentare. Detyra jonë është të marrim pjesë atje, të ngremë zërin e qytetarëve dhe të bëjmë opozitën. Ne do të ndjekim çdo rregullore, por ajo çfarë unë jam sot këtu për të thënë, është që Partia Socialiste nuk mundet dhe nuk do ta lejojmë që në mënyrë të hapur të shkel rregulloren.
Nuk kemi pasur komunikim me LSI, pranuam kërkesën e LSI që ata të mund të marrin kohë në këtë seancë që dhe ata të zënë vendin e tyre. Kjo ishte kërkesa jonë që u refuzua nga Partia Socialiste”, shprehet Rushaj në një prononcim për mediat.
Rushaj u pyet nga gazetarët se di do të veprohet pasi Sali Berisha u vetëdeklarua në Kuvend si anëtar i grupit parlamentar të PD-së.
“Do ndjekim çdo rregull, çdo rregullore. Jam këtu për të thënë që PS-në nuk do ta lejojmë të shkelë në mënyrë të hapur rregulloren”, tha Rushaj.
LEXO EDHE:
Basha dhe deputetët e PD braktisin Kuvendin, i ndjek edhe Berisha (VIDEO)
Etiketa: Alfred Rrushaj, bojkoti, Kuvendi i Shqipërisë, opozita, seanca e kuvendit, Video
