Mbledhja e kryesisë së Grupit Parlamentar të Partisë Demokratike është shoqëruar me debate mes mbështetësve të ish-kryeministrit Sali Berisha dhe Lulzim Bashës.
Deputeti Flamur Noka, i cili i ka qëndruar në krah Berishës që prej përjashtimit të tij nga Basha, ka debatuar me kryedemokratin lidhur me vendimin e tij.
Por qëndrimi i Bashës ka qenë i palëkundur, dhe i njëjtë me atë që ka mbajtur publikisht. Basha tha se ky ka qenë një prej vendimeve më të vështira që ka marrë, por paralajmëroi se nuk do të lejojë grupe me frymë anti-amerikane në PD.
“I ngule thikën pas shpine Berishës”, mësohet t’i ketë thënë Noka-Bashës.
“Brenda PD nuk do të krijohet një grup që mbron apo bën qëndrime anti-amerikane. Deputetët të mos i referohen gjysmë të vërtetave. Ky ka qenë një nga vendimet më të vështira që kam marrë në krye të PD”, i është përgjigjur kryedemokrati Basha.
Debati në PD
Flamur Noka: Me këtë vendim i ke ngulur thikën pas shpinës Sali Berishës.
Lulzim Basha: Kërkesa për doktorin nuk ka ardhur nga zyrtarë të nivelit të tretë apo të rangut të ulët. Ka ardhur nga kupola e shtetit amerikan. Informacionet i di unë siç i di shumë mirë edhe doktori dhe që ju s’keni për t’i marrë vesh kurrë.
Flamur Noka: Vendimin për Berishën duhet ta marrin vetëm forumet drejtuese të PD.
Lulzim Basha: S’ka për të pasur grup anti-amerikan në logon e PD. Jam marrë edhe tre muaj për zgjidhjen e këtij konflikti, nuk ka qenë vendim i marrë në minutat e fundit. Vendimi është marrë për të mos përçare partinë dhe demokratët. Deputetët të mos i referohen gjysmë të vërtetave. Ky ka qenë një nga vendimet më të vështira që kam marrë në krye të PD.
***
Ndërkohë, deputeti i PD-së, Enkelejd Alibeaj ka folur për median pas përfundimit të mbledhjes së grupit parlamentar të Partisë Demokratike.
Ai është shprehur se diskutuan për strategjithë e opozitës në Parlament, teksa tha se armiku i vetëm i shqiptarëve është Edi Rama.
“Diskutuam strategjitë e opozitës në Parlament. Armiku i vetëm i shqiptareve është Edi Rama. Me atë do luftojmë të gjithë me strategji dhe me çdo mjet tjetër”, tha Alibeaj ndër të tjera.
Kujtojmë që Kryesia e Grupit Parlamentar u mblodh sot rreth orës 12.30. Ndërsa më herët socialistët janë mbledhur sipas asaj që ka deklaruar Taulant Balla, puna e PS do të fokusohet te ndryshimet Kushtetuese për zgjatjen e procesit të vettingut.
