Në lidhje me fillimin e sezonit të ri në La Liga, Del Bosque tha: “Ne jemi në javën e tretë. Ekzistojnë dyshime në të gjitha skuadrat. Atletico Madrid kryeson renditjen me 9 pikë, pavarësisht një ristrukturimi të madh dhe thelbësor në grupin e lojtarëve. Te Real Madridi kanë dyshimet e tyre, sepse posedojnë një grup të shkëlqyer lojtarësh, por nevojitet përshtatja e gjithsecilit në vendin ku jep më të mirën. Barcelona ka vuajtur mungesat e Messit dhe Suárez, dy lojtarë shumë të rëndësishëm për të. Hazard, po ashtu, ka qenë i lënduar te Real Madridi”.
Lidhur me shitjen e Cristiano Ronaldos nga “Los Blancos”, ai nënvizoi: “Modric, Kroos, Marcelo dhe Cristiano Ronaldo kanë qenë pika kyçe në vitet e fundit te Real Madridi. Më meritori mendoi se ishte Ronaldo. Unë jam në mesin e atyre që mendoj se diçka ka ndodhur me largimin e tij”. Duke u ndalur te kthimi i Zidane si trajner në “Bernabeu”, pasi u largua nga kjo detyrë më herët, veterani i trajninut spanjoll u shpreh: “Klubi kishte një problem me stolin në sezonin e kaluar dhe e zgjidhi atë në mënyrën më të mirë të mundshme me kthimin e Zidane”. Ai, gjithashtu, mbrojti figurën e Ernesto Valverde: “Më pëlqen shumë, përfaqëson një lloj trajneri, që më tërheq. Valverde përfaqëson mirë trajnerin spanjoll dhe stërvitjen, që trajnerët spanjollë po praktikojnë tani”.