Ferdinand Shehu është ish-drejtori i ALUIZNI në Tiranë, që iu sekuestruan 1.5 milionë euro pasuri nga Policia e Shtetit. Ferdinand Shehu dyshohet se këtë pasuri e ka vendosur në kohën që drejtonte institucionin që merrej me legalizimet në Tiranë në vitet 2006-2011. “Ferdinand Shehu ka tentuar transferimin e 1 milionë eurove jashtë vendit, me justifikimin për investime financiare, ndërkohë 500 000 Euro të tjera i ka vendosur në depozitë me afat”, – thotë policia.
Ferdinand Shehu, ish-kreu i ALUIZNI-t për qarkun Tiranë u shkarkua në tetor 2011. Vendimi asokohe u mor nga drejtori i përgjithshëm i ALUIZNI-t Shaban Memia, me motivacionin për mungesë të integritetit personal dhe mashtrim të organeve emëruese përmes manipulimeve në jetëshkrim.
Shehu ka qenë më parë edhe drejtor i ANTA-s.
Njoftimi i policisë
Në vijim të punës për gjurmimin, evidentimin dhe sekuestrimin e pasurive të paluajtshme dhe të shumave financiare, që dyshohet se janë përfituar nga burime të paligjshme, Drejtoria për Hetimin e Krimeve Ekonomike e Financiare në Departamentin e Policisë Kriminale, në bashkëpunim me Seksionin për Hetimin e Pastrimit të Parave, në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësor Tiranë, finalizoi operacionin policor të koduar “Investimi”, për sekuestrimin e 1 500 000 euro llogari bankare.
Këto llogari janë të një shtetasi, ish – punonjës i administratës shtetërore i cili në vitet 2006 – 2011 ka mbajtur funksione zyrtare në Agjencinë e Legalizimit, Urbanizimit dhe Integrimit të Zonave Urbane.
Ky shtetas dyshohet se ka konsumuar veprën penale “Pastrimi i produkteve të veprës penale”, parashikuar nga neni 287 i Kodit Penal, duke kryer disa investime në pasuritë e paluajtshme.
Kohët e fundit, nëpërmjet një banke private, shtetasi i lartpërmendur ka tentuar transferimin e 1 milionë eurove jashtë vendit, me justifikimin për investime financiare, ndërkohë 500 000 Euro të tjera i ka vendosur në depozitë me afat.
Për arsye se hetimet janë në vijim, nuk mund të jepen të dhëna të tjera.
Ferdinand Shehu