Një mësuese e gjimnazit “Ismail Qemali” në Tiranë denoncon se janë shumë raste me Covid-19 që paraqiten në ambientet e shkollës duke mos zbatuar rregullin e karantinimit të detyruar.
Ajo i bën thirrje të gjitha instancave, Ministrisë së Arsimit, Ministrisë së Shëndetësisë, të ndërmarrin sa më shpejt masat që shkolla të jetë ambient i frekuentueshëm për të gjitha palët.
Mësuesja denoncon nëndrejtoreshën e shkollës “Ismail Qemali”, duke thënë se ka qënë në shkollë deri më 13 shtator, pavarësisht faktit se ka qenë e prekur nga koronavirusi. Akuzon për papërgjegjshmëri edhe drejtoreshën e gjimnazit, pasi nuk ka ruajtur protokollin strikt anti-Covid.
Mësuesja bën të ditur më tej se një pjesë e kolegëve, nga 87 në total, i janë nënshtruar tamponit. Për të përbën shqetësim edhe mënyra se si i matet temperatura nxënësve.
“Gjatë kësaj periudhe i jemi nënshtruar takimeve rutinë, mbledhjeve në varësi të departamenteve dhe nëndrejtoresha ka qenë prezente me ne. Nuk mund të hamendësojmë shumë, por nisur nga një logjikë e thjeshtë, nëse realisht konfirmimi është marrë ditën e mërkurë, i bie që minimalisht janë 48 orë nga dalja e rezultatit, shto këtu ditët kur nëndrejtoresha ka paraqitur simptomat. Si mundet që të marrë këtë përgjegjësi mbi veten dhe të na riskojë ne të tjerëve, mësues, prindër dhe fëmijë”, thotë mësuesja e gjimnazit “Ismail Qemali”.
“I gjithë stafi ka qenë në kontakte të vazhdueshme në takime dhe mbledhje. Drejtoresha e shkollës nuk ka ruajtur protokollin. Ka qëndruar në ambientet e shkollës dhe para se të niste procesi mësimor, por edhe pas datën 14, pa maskë. Është kontakti më i afërt”, vijon ajo.
“Pas bërjes publike, është detyruar që një pjesë e mësuesve që i janë nënshtruar tamponit bashkë me pjesën e mbetur, stafit drejtues të karantinohen në kushtet e shtëpisë. Nuk e kuptoj pse duhet të mbahet e fshehur kjo gjë. Janë rreth 100 veta staf, 86-87 janë mësues, të tjerë janë roje, sanitarë, mjekë të shkollës. Të gjithë jemi potencial i mundshëm i infeksionit”, shprehet mësuesja.
Mësuesja thotë se ka nxënës që futen në shkollë, ndonëse janë me temperaturë 38. “Nxënësit thonë që kanë parë bashkëmoshatarë që kanë shënuar temperaturën 38 dhe janë lejuar të futen në shkollë me pretekstin se e kanë nga vapa.”
