Një ndër ngjarjet më të rënda të ndodhura në Durrës, ajo ndaj prokurorit Arjan Ndoja, ku mbeti i vrarë Andi Maloku dhe i plagosur Landi Muharremi, mbetet ende mister sa i përket largimit të autorëve.
Sipas dëshmisë së babit të Andi Malokut, por edhe disa burimeve policore, uniformat blu në Durrës, morën informacion në kohë për ngjarjen, por operacioni i finalizimit nuk u konkludua.
Ndërkohë, një denoncim i mbërritur në Gazetën MAPO ngre dyshime për rolin e policisë së Durrësit dhe drejtuesit të saj në këtë ngjarje.
Lorenc Shehu, me detyrë drejtor i Policisë së Durrës, i emëruar vetëm 1 muaj para ngjarjes, në denoncimin e mbërritur në MAPO, akuzohet se “ka ndikuar duke iu hapur rrugë autorëve që të largoheshin të pashqetësuar nga vendi i krimit“.
Në fakt, edhe pas atentatit, ka mbetur mister fakti pse Lorenc Shehu nuk i orientoi makinat e policisë drejt vendit ku u larguan autorët, por një informacion që iu është përcjellë efektivëve në momentin e ngjarjes, ka bërë që patrulla e uniformave blu të ndjekë rrugën e gabuar me atë të autorëve.
Kjo ka bërë që vrasësit të humbnin gjurmët brenda pak sekondash. Keqinformimi i patrullës së policisë dyshohet se ka qenë i qëllimshëm.
Do të ishte e udhës një hetim i SHÇBA-së për këtë çështje, edhe pse i vonuar, nëse kemi të bëjmë apo jo me një implikim direkt të kryepolicit të Durrësit në një nga ngjarjet që ka tronditur opinionin publik.
Për ngjarjen u arrestua vetëm Redjan Rraja, pas hetimeve që bëri prokuroria, ndërkohë që bashkëpunëtori i tij, edhe pse i identifikuar, nuk është arrestuar ende. Vlen të theksohet se zbulueshmëria e krimeve nga policia e Durrësit lë për të dëshiruar.
Policia në Durrës po akuzohet shpesh se ka bashkëpunuar me bandat kriminale në këtë qytet, që janë disa.
Etiketa: Andi Maloku, Arjan Ndoja, Atentati i Durresit, Landi Muharremi, Lorenc Shehu, Redjan Rraja
