Grupi Parlamentar i Partisë Demokratike është mbledhur për të diskutuar për vijimësinë e procesit të zgjedhjes së presidentit dhe nëse do të sjellin një emër në raundin e tretë. Ata kanë dalë me një sugjerim të ri, duke kërkuar bojkotimin e procesit, me argumentin se mazhoranca ka shkelur marrëveshjen.
Kreu i grupit Parlamentar në Partinë Demokratike, Enkelejd Alibeaj ka sugjeruar që mos të marrin pjesë në raundin e tretë për zgjedhjen e presidentit.
“Sugjeroj që s’ka asnjë arsye të marrim pjesë. Ata thyen marrëveshjen”, tha Alibeaj. Të këtij mendimi kanë qenë edhe shumica e deputetëve.
Deputeti Gazment Bardhi ka thënë se kryeministri Rama do e vendosë vetë Presidentin, prandaj prishi edhe marrëveshjen me opozitën.
“Pas tërheqjes nga marrëveshja publike, unë mendoj që grupi ynë duhet ta konsiderojë të mbyllur këtë proces. Edi Rama prishi marrëveshjen me opozitën, sepse nuk do një president për shqiptarët. Edi Rama u tërhoq nga marrëveshja, sepse e ka paracaktuar Presidentin. Prandaj unë mendoj që grupi duhet të dal me një deklaratë ku të sqarojë këtë pozicion dhe ne nuk duhet të vazhdojmë më me këtë pasi maska e fasadës së Edi Ramës ka rënë”, tha Bardhi.
Njëjtë është shprehur edhe deputetja Jorida Tabaku, e cila është shprehur se PD duhet t’i japë fund pjesëmarrjes në procesin e zgjedhjes së presidentit.
Janë zbardhur debatet ndërmjet deputetëve të PD-së në mbledhjen e grupit parlamentar, të thirrur nga Enkelejd Alibeaj, mbi qëndrimin për raundin e tretë për zgjedhjen e Presidentit të ri të vendit.
Deputeti Ferdinand Xhaferraj u shpreh se Rama ka treguar që i do të gjitha vetë. Sipas tij, këtë e treguan dy raundet e para, prandaj PD s’duhet të vazhdojë më me procesin.
“Prodhuam 8 emra ne një mbledhje shumë të mirë të grupit dhe propozuam 8 emra. Tani Taulant Balla doli bllof. Dëshmuam që ne nuk jemi si Saliu. Dhe po ju tregojmë që s’jemi as si Rama“, mësohet të jetë shprehur Xhaferraj.
Të hënën zhvillohet raundi i tretë i votimit të presidentit. Edhe në këtë raund duhet të propozonte emrin e kandidatit opozita, por me tërheqjen e PD-së, ekziston mundësia që raundi të digjet, ashtu siç ndodhu me dy raundet e para./Liberale.al
