SARANDË – Avokati i njohur, Marjel Mejdi, 39 vjeç, është dhunuar sot barbarisht nga persona të paidentifikuar në qytetin e Sarandës. Mësohet se ai është goditur me shkop bejsbolli nga një grup prej 3-4 personash të cilët i kishin zënë pritë.
Gjendja shëndetësore e avokatit paraqitet e rëndë pasi ka marrë disa plagë në trup. Mësohet se ai ka dorën dhe këmbën të thyera, ndërsa ka dhe fraktura të shumta në trup.
Mejdi ka qenë duke udhëtuar me automjetin e tij tip “Mercedes Benz” kur është ndaluar nga autorët. Makinës i janë thyer xhamat nga goditjet me shkop bejsbolli dhe sende të tjera të forta.
MAPO sjell pamjet e automjetit dhe pasojat e dhunës së ushtruar. Pasi makinës i kanë thyer xhamat kanë nxjerrë drejtuesin e automjetit duke e goditur me shkop bejsbolli.
Avokati ishte i njohur edhe për angazhimin politik në krah të Partisë Demokatike, teksa gjatë fushatës elektorale ishte caktuar Koordinator Politik në Qarkun e Tiranës.
Mësohet se disa kohë më parë avokatit i kanë rrahur edhe xhaxhain, shtetasin me iniciale I.Mejdi dhe djalin e hallës A.K., në dy ngjarje të ndryshme.
Gjatë dëshmisë së tij para oficerëve të policisë, nga shtrati i spitalit avokati tha se shkak i sulmit është bërë një konflikt pronësie mes familjes se tij dhe disa personave të tjerë.
Aktualisht policia po vijon hetimet për identifikimin dhe arrestimin e autorëve.
NJOFTIMI I POLICISË
Rreth orës 13:05, në lagjen Nr.4, në afërsi të Portit, Sarandë, dyshohet se si pasojë e një konflikti të çastit është dëmtuar me sende të fortë, shtetasi M. M., 39 vjeç, banues në Sarandë, i cili është dërguar për ndihmë mjeksore, jashtë rrezikut për jetën.
Sherbimet e Policise kane shkuar menjeherë në vendngjarje. Është ngritur grupi hetimor i cili vijion veprimet në vendin e ngjarjes me qëllim zbardhjen e rrethanave të ngjarjes, identifikimin dhe kapjen e autorit/ve.
Në ambientet e Komisariatit të Policisë Sarandë janë shoqëruar disa persona për tu marrë në pyetje në lidhje me ngjarjen.
