Christiane Hohmann është emëruar kryetare e Delegacionit të BE-së në Shqipëri, duke zëvendësuar këtë detyrë Luigi Soreca-n.
Ajo sapo ka mbaruar mandatin e saj si ambasadore e Gjermanisë në Estoni dhe më parë ka shërbyer si ambasadore gjermane në Bosnje dhe Hercegovinë.
Emërimi është bërë nga Përfaqësuesi i Lartë i Bashkimit për Punë të Jashtme dhe Politikë të Sigurisë Josep Borrell, i cili emëroi 31 kryetarë të Delegacioneve të Bashkimit Evropian.
Kush është Christiane Hohmann?
Hohmann është një emër i njohur në diplomacinë gjermane.
Ajo ka përfunduar fillimisht studimet për anglisht dhe frëngjisht në Berlin, në vitin 1988.
Nga viti 1988 deri në 1991 ajo ishte studente hulumtuese për letërsinë angleze në Universitetin Humboldt në Berlin dhe më pas përfundoi shërbimin përgatitor për shërbimin e lartë të jashtëm midis 1991 dhe 1993.
Punën e parë në këtë rang e filloi në Ministrinë e Jashtme Federale në Berlin. Më pas, nga viti 1994 deri në vitin 1997, punoi në Ambasadën e SHBA-ve.
Ndërmjet viteve 97’-2000, Hohmann punoi sërish në Zyrën Federale të Jashtme. Më pas, mori rolin e përfaqësueses së përhershme e ambasadorit gjerman në Kamerun, post të cilin e mbajti tre vjet, nga viti 2000-2003.
Në vitin 2005, ajo filloi punë si zyrtare shkëmbimi në Komisionin Evropian në Bruksel dhe e mbajti detyrën deri në vitin 2010.
Në vitin 2016, Hohmann mori postin e parë si diplomate gjermane, duke u caktuar si ambasadore e Gjermanisë në Bosnjë dhe Hercegovinë.
Në korrik të vitit 2019, pasi mbaroi mandatin në Bosnjë dhe Hercegovinë, u caktua si ambasadore në Estoni.
Tashmë, me mbarimin e mandatit në Estoni, ajo caktohet si përfaqësuese e BE-së në Shqipëri.
