Gratë naftëtare të Ballshit kanë hyrë në ditën e 22 të grevës së urisë.
Ato shprehen të vendosura se nuk do ta dalin nga greva ndërsa i bëjnë thirrje kryeministrit Edi Rama që të shkojë aty për të dialoguar. Gratë naftëtare denoncuan sot mesazhet dhe thirrjet telefonike me privat, që të ndërpresin grevën e urisë.
“Ne nuk dalim nga greva, të vijë Rama e të dialogojmë! Kemi pasur thirrje e mesazhe me privat, këto janë thirrje partiake. Nuk dëgjojmë ato telefonata që na kërcënojnë të lëmë grevën. Nuk dorëzohemi, ne duam bukën e gojës të premtuar nga Rama”, shprehen gratë naftëtare.
Teksa kanë kaluar 22 ditë nga nisja e grevës së urisë prej grave naftëtare, qeveria ende nuk ka adresuar asnjë prej kërkesave të tyre. Naftëtarët protestojnë prej më shumë se një muaji për pagat e prapambetura, pagesën e sigurimeve shoqërore si dhe për rinisjen e punës në uzinën e përpunimit të naftës.
Kryeministri Edi Rama ka kërkuar ndërprerjen e grevës në fillim dhe më pas do të ulet me ta në dialog, por naftëtarët nuk i besojnë kreut të qeverisë, duke i thënë se po tenton t’i manipulojë thjesht e vetëm për të mbyllur grevën e urisë.
Etiketa: Ballsh, Grate naftetare, greva e urisë, Naftetaret e Ballshit, protesta
