Kryetarja e Kuvendit, Lindita Nikolla ka përshëndetur sot me një mesazh Ditën e Çlirimit të Kosovës. Ajo thotë se kjo ditë u arrit falë veprave të UÇK-së dhe popullit kosovar.
Sipas saj, sfidat e Kosovës janë edhe sfidat e Shqipërisë, ndërsa shpreh mirënjohje për aleatet si NATO dhe SHBA. Lindita Nikolla thekson se anëtarësimi i Kosovës në Këshillin e Evropës është një kërkesë e drejtë dhe e merituar.
“Sot është një ditë e shënuar për Kosovën, Shqipërinë dhe të gjithë shqiptarët.
Çlirimi i Kosovës është vepër e Ushtrisë Çlirimtare të Kosovës, e popullit të Kosovës, me mbështetjen e aleatëve të mëdhenj të kombit shqiptar, SHBA dhe NATO.
Kosova e pavarur dhe demokratike është rezultat i Kosovës së lirë.
Shqipëria qëndron në krah të Kosovës, për përballimin e sfidave të përbashkëta. Sepse sfidat e Kosovës janë edhe sfidat e Shqipërisë. Kuvendi i Shqipërisë dhe Kuvendi i Kosovës po bashkërendojnë diplomacinë parlamentare për përballimin e tyre.
Anëtarësimi i Kosovës në Këshillin e Evropës, një kërkesë e drejtë dhe e merituar.”, shkruan Kryetarja e Kuvendit, Lindita Nikolla.
