Intervistoi: Mirgen Çela
Është ndër deejay-t më me zë dhe më të preferuar në Shqipëri. Njihet për pasionin e zjarrtë që ka për muzikën pasi që prej lindjes është rritur më të. Tepër aktiv në rrjete sociale dhe shpeshherë është qendër e mediave rozë. Dj Sardi gjithmonë preferon ta mbajë larg syrit të publikut jetën e tij sentimentale edhe pse rreth saj është folur shumë. Në një intervistë për Gazetën MAPO, Sardi Shehu, djali i kompozitorit të madh Flamur Shehu, ka treguar njohjet e tij në muzikë, zhvillimi i karrierës në Shqipëri dhe ndër të tjera ekskluzivisht për MAPO tregoi mbi projektet e tij të ardhshme.
“Kush është” DJ Sardi, si e nisi lidhjen e tij me muzikën?
Unë kam lindur me muzikë të them të drejtën, babai im është kompozitor dhe normalisht muzika është pjesë e jetës sime.
Nga kush u inspiruat të merreshit me muzikë?
Normalisht ka qenë një pasion dhe që në klasën e parë e kam nisur në “Liceun Artistik” të Tiranës për piano deri në “Akademinë e Arteve” dhe pasioni për muzikën s’do mbarojë kurrë.
Sa e vështirë është të gjendesh në treg si DJ? A është e vështirë të bësh karrierë në Shqipëri?
DJ mund të jesh i suksesshëm në qoftë se nuk dorëzohesh kurrë dhe dashuron punën që bën. Në qoftë se e bën me pasion çdo punë kthehet në sukses.
A keni patur një moment ku keni thënë ‘boll më, do heq dorë’?
Boll, mund të vijë një ditë të largët që do më ndajë nga DJ, por jo nga muzika.
Përveçse DJ, a ka Sardi një tjetër pasion të fshehur që s’e ka treguar më parë?
Pasioni im janë sportet në përgjithësi, futbolli në veçanti.
Në cilën periudhë të vitit jeni më shumë i angazhuar me punë?
Angazhimi më i madh është në sezonin veror normalisht, por ka bukurinë e saj.
Cilat janë bashkëpunimet më të veçanta për ty, kush ju la mbresa prej artistëve?
Të them të drejtën çdo bashkëpunim e kam realizuar me artistë shumë profesionistë dhe jam shumë i kënaqur si nga ana e profesionalizmit që kanë treguar, por dhe nga ana e materialit.
A ka konkurrencë mes DJ në Shqipëri?
Normalisht që ka konkurrencë, në qoftë se s’ka konkurrencë mes dj nuk ecim dot përpara, do mbeteshim në vend.
Çfarë projekti pritet nga DJ Sardi? A do të kesh bashkëpunime?
Kam rreth 3-4 projekte që do t’i nxjerr gradualisht gjatë pranverës dhe verës, ka bashkëpunime remixe, më saktë t’iu lëmë kohën e duhur të piqen si projekte.
