Komisioni Qendror i Zgjedhjeve, njoftoi sot përmes zëdhënëses Drilona Hoxha se ka mbërritur kërkesa e Kuvendit për vakancën, pas djegies së mandateve nga 57 deputetët e opozitës. Ajo tha se KQZ do kontaktojë kandidatët e listës, të cilët duhet të plotësojnë formularin e vetëdeklarimit. Sipas KQZ kandidatët kanë afat 10 ditë për të dorëzuar këtë formular.
“Duke marrë shkas nga sensitiviteti i treguar nga media dhe opinioni publik lidhur me çeshtjen e zëvëndësimit të vakancave të krijuara në Kuvendin e Shqipërisë, Komisioni Qendror i Zgjedhjeve ju bën me dije se, në KQZ mbërritur kërkesa e Kuvendit të Shqipërisë për plotësimin e vendeve vakante për 57 deputetë të dorëhequr. KQZ konfirmon vijimin e procedurave të mëtejshme në zbatim të nenit 164 të Kodit Zgjedhor.
Ligji i kërkon KQZ-së që të kontaktojë kandidatët e listave respektive sipas radhës dhe t’u kërkojë atyre plotësimin e formularit të vetëdeklarimit pa të cilin nuk mund të marrin vertëtimin e zgjedhjes. Kandidatët e listës shumemërore kanë afat 10 ditë për dorëzimin e formularit të vetëdeklarimit. Pas verifikimit dhe shqyrtimit nga Administrata e KQZ-së zëvëndësimet e vakancave të krijuara, do të kalojnë në mbledhjet publike të KQZ-së”, tha zëdhënësja e KQZ. Kuvendi i është drejtuar përmes një shkresë KQZ-së që të nisë procedurën e zëvendësimit të mandateve të opozitës me kandidatët e listës, pas djegies së mandateve nga 57 deputetët e opozitës.
/Mapo.al/
