Drejtori i Përgjithshëm i Portit të Durrësit, Agron Tare, ka njoftuar këtë të enjte dorëheqjen nga posti. “Sot mbaron misioni im” – shkruan ai duke përshëndetur me një shprehje italiane: “Ciao a tutti, belli e brutti!”
“Sot mbaron misioni im si Drejtor i Përgjithshëm Ekzekutiv i Autoritetit Portual Durrës. Që prej marrjes së detyrës si Drejtor i Përgjithshëm Ekzekutiv i Autoritetit Portual Durrës, kam shërbyer më devotshmëri dhe pasion për punën, gjë që e tregojnë rezultatet e deritanishme financiare të këtij institucioni. Dorëhiqem për të vijuar rrugëtimin tim profesional dhe duke i uruar pasardhësit/es tim/e suksese! Nuk mund të lë pa falenderuar ata që më besuan këtë pozicion të rëndësishëm, ekipin e APD-së, bashkëpunëtorë të mi, të afërt e të largët! Ciao a tutti, belli e brutti!”-shkruan Agron Tare.
z. Tare qendroi 10 muaj në këtë detyrë të rëndësishme. Siç duket Tare nuk ka preferuar ti bëjë publike arsyet e dorëheqjes.
Ai është vëllai i Auron Tares i cili deri në mars të këtij viti ishte drejtor i Agjencisë së Bregdetit. Po kështu është dhe vëllai i Igli Tares, drejtor sportiv i ekipit të Lacios.
*Foto nga prezantimi i Agron Tares si drejtor i APD më 23 Janar 2019
