Lajmi i bërë sot publik, për vendimin e Prokurorisë së Krimeve të Renda, që ka shpallur moskompetencën lidhur me dosjen 184, tregon se hetimi për ish-ministrin, sot deputet dhe sekretar për zgjedhjet në PS, Damian Gjiknuri, dhe deputetët e tjerë, Ulsi Manja, Xhemal Qefalia apo dhe kryetari aktual i Bashkisë Lezhë, Pjerin Ndreu, mund të jetë pushuar.
Kjo, sepse dosja 184, tashmë i ka kaluar prokurorisë së Dibrës. Por prokuroria e rrethit Dibër nuk mund të hetojë deputetë dhe zyrtarë të lartë të qeverisë. Ndaj, kjo prokurori, e solli dosjen pranë Krimeve të Renda. Ndërsa Krimet e Renda e kanë kthyer mbrapsht atje pas 3 vitesh, do të thotë se tashmë i kërkojnë Prokurorisë së Dibrës që të hetojë zyrtarët vendorë, drejtuesit lokalë që janë të përfshirë në këtë aferë.
Dosja 184 ishte nga më të rëndat dhe ku doli se deputetë, ministra e deri kryeministri përmendeshin në të. Përfaqësuesit e lartë të PS dhe qeverisë, nga përgjimet të bëra publike nga gazeta gjermane Bild, rezultuan se ishin në krye të mekanizmit, pasi kontrollonin zyrtarët vendorë që ishin në aksion atje për blerje vote, apo shantazhim të qytetarëve.
Dosja 184 lindi nga një kallëzim i Partisë Demokratike, pak ditë para mbajtjes së zgjedhjevetë pjesëshme vendore, të vitit 2016 në Dibër.
Prokuroria e Përgjithshme dhe Prokuroria e Krimeve të Renda, është nën detyrimin ligjor dhe publik, që të dalë e të sqarojë opinionin, e të bëjë transparencë për këtë cështje. Cili është vendimi, a janë pushuar hetimet për Gjknurin dhe drejtuesit e lartë të PS, dhe mbi c’bazë juridike, apo me cfarë argumentimi ka ndodhur kjo.
