Të dielën që shkoi, PSG-ja mundi 7-1 Monakon dhe u shpall kampione e Francës. Një fitore e merituar për skuadrën e Emeri, që ka dominuar në këtë kampionat edhe falë lojës dhe golave të Nejmarit, para se të dëmtohej dhe të humbiste fazën finale të sezonit.
Braziliani mungoi në festën e titullit dhe kjo gjë ka sjellë reagime të ndryshme, pasi sulmuesi kishte preferuar të luante poker. Ky veprim ka sjellë tërbim në Francë dhe shumë personazhe të njohur e kanë sulmuar sulmuesin.
Ish-sulmuesi i Francës dhe Milanit, Kristof Dugarri, ka lëshuar deklaratat më të ashpra, duke e sulmuar keq Nejmarin: “Si ka mundësi të mungosh ditën, kur skuadra jote fiton titullin? Si mund të thuash se je lider? Nejmar është vetëm një egoist i tmerrshëm, që sheh vetëm veten dhe bën një lojë individuale”.
“Nëse do të isha tifoz i PSG-së, do të isha tërbuar, sepse ai po pështyn mbi klubin. Kur e shoh në fushë, më duket sikur po luan kalçeto me shokët. Pret kundërshtarin dhe e provokon me lëvizjet e tij. Diçka krejtësisht e kotë”, – ka thënë Dugarri./ Vipsport.al
