Në një debat të fortë mbrëmë në studion e Real Story, në News 24, me analistin Fatos Lubonja, kreu i PD, Basha ka zbërthyer atë që e cilësoi si qendrimin proamerikan, që është sipas tij në themelet e forcës politike që drejton, e prej të cilit nuk mund të iket.
Publicisti ka qendruar në tezat e tij, duke thënë se principi kryesor amerikan, është liria, demokracia dhe e drejta për të kundërshtuar. Lubonja e ka cilësuar dy herë gabim përjashtimin e Sali Berishës.
“Linja ime është kjo dhe kjo hap debat tjetër. Kjo që ka bërë zoti Basha është një gabim politik. Gabim i dyfishtë politik. Jo shpallja non grata, por përjashtimi meqenëse amerikanët e shpallën non grata. Është gabim politik që po e tregon koha në terma afatshkurtra, në kuptimin që partia është përçarë më tepër se kurrë. Basha dhe Berisha po asgjësojnë njeri-tjetrin me akuza që i bën dëm kredibilitetit të partisë. Është gabim politik sepse bën lojën e kundërshtarët i cili bën qejf duke u tallur me këta në parlament dhe qeveris i qetë. Në terma afatgjata është gabim politik për mënyrën se si u bë. Unë nuk dua të jetoj në një Shqipëri që të jetë koloni. Dua të jetoj si qytetar në vendin tim, ku kryetarin e opozitës e zgjedh elektorati, shqiptarët dhe jo ambasada amerikane. Dua që cilido qoftë ai, të votohen të provohen se sa mbështetje kanë nga shqiptarët. Në rast se duhet përjashtuar apo jo kjo nuk mund të merrej se kështu tha guvernatorja Yuri Kim, por duke u konsultuar me të gjithë partinë si ka marrë dy vendime të rëndësishme lënin e parlamentit apo hyrjen në çadër. Ato kanë qenë më të rëndësishme se ky, por dhe ky është një vendim i rëndësishëm. Në qoftë se duam të jemi një parti autokratike legjitimitetin nuk ta jep elektorati, por ambasadorja është traditë e vjetër, enveriste quaje dhe berishiste po deshe, kjo nuk i emancipon shqiptarët”, tha Lubonja.
Basha komentoi duke thënë se ka disa aspekte të orientimit të PD, që janë në themelet e saj, që nuk mund të debatohen.
“Ka disa çështje të tjera në PD nuk janë çështje të mendimit ndryshe, por të identitetit të PD. Kjo jo se kështu më pëlqen mua, apo se më është tekur mua, sepse na konvenon një situatë e tillë. Janë të mishëruara në atë që është kushtetuta e PD. Një nga këto përcaktime të PD-së ndër to futet dhe antikomunizmi është orientimi pro perëndimor pro atlantik në krah të BE dhe SHBA-ve. Këtu nuk mund të kemi ndryshime mendimi, bëhet fjalë për identitetin e forcës politike”, pohoi kreu i PD.
Lubonja e ka pyetur zotin Basha nëse ai mendon se akuzat për Berishën qendrojnë, dhe a mendon ai se Berisha është i korruptuar.
“Pa diskutim as nuk kam komentuar dhe as komentoj vendimet e qeverisë së SHBA-ve”, u përgjigj Basha.
Kjo solli reagimin e analistit.
“Si nuk mund t’i komentosh. Ik nga partia atëherë. Jam komentator dhe i komentoj. Si nuk mund t’i komentosh ti. Kjo është t’i bësh budallenj shqiptarët. Ndihem i fyer që thua kështu. E komenton Amerika vetë e para. E komenton Biden, Trumpin. Kjo është t’i bësh shqiptarët budallenj, mbyllni sytë. Afganistani ishte dështim total dhe ky thotë nuk komentoj. Kur komenton Afganistanin, komenton dhe gjënë tënde. Jeni i bindur se Sali Berisha është i korruptuar? Më jep një përgjigje”, pohoi Lubonja me tone të larta.
Basha replikoi duke thënë:
“Mos nxirrni jashtë kontekstit. Me shumë respekt zoti Lubonja. Nuk dua që të nxirret jashtë konteksti ajo që thashë. Kam komentuar çdo vendim të SHBA-ve që ka të bëjë me interesin kombëtar të shqiptarëve. Nuk mund të komentoj një vendim non grata”
Etiketa: Berisha Non Grata, Fatos Lubonja, Lulzim Basha, Qendrimi pro-amerikan
