Pavarësisht apelit për respektimin e masave anti-Covid, si Berisha edhe Basha, në dy të shtunat e fundit kanë neglizhuar çdo rregull në Kuvendet e thirrur prej tyre. Ndërkohë në 7 ditë në vendin tonë kanë humbur jetën 31 pacientë e janë infektuar 2334 qytetarë.
***
Ndërkohë që bota po ngre alarmin për rrezikun nga varianti Omicron i koronavirusit, e kur në vendin tonë vijon të jetë në fuqi masa e ndalimit të grumbullimit të më shumë se 50 personave, dy të shtunat e fundit ka pasur një neglizhencë të rregullave anti-Covid.
Beteja politike e liderve të Partisë Demoktatike në dy javët e fundit duket se ka lënë jashtë vëmendjes rrezikun nga përhapja e covid 19.
Por ndërkohë, Kuvendi Kombëtar i thirrur nga anëtarësia e PD deklaroi se stadiumi “Air Albania” u mbush me rreth 4900 delegatë dhe shumë të tjerë anëtarë, këtë të shtunë kryedemokrati Basha deklaroi se kishte mbi 5000 të pranishëm te Pallati i Kongreseve.
Në kushtet ku nuk ishte e mundur ruajtja e distancës, e ku të rrallë ishin ata që mbajtën maska, numri i infektimeve në ditët në vijim rrezikojnë të rriten.
Në javën që lamë pas ka shënuar një ulje të infektimeve në 24 orë.
Ministria e Shëndetësisë ka raportuar se nuk ka pasur më shumë se 380 infektime në një ditë, ndërsa numri më i lartë i humbjeve të jetëve është 8.
Në harkun kohorë të 7 ditëve janë infektuar 2334 qytetarë dhe kanë humbur jetën 31 pacientë.
Që prej fillimit të pandemisë Tirana mban vendin e parë, si vatra me përhapjen më të madhe të virusit Sars CoV 2.
Që prej fillimit të pandemisë janë regjistruar 205,549 raste pozitive, numër që në fakt ekspertët pretendojnë të jetë më i lartë, për shak se jo të gjithë i janë nënshtruar testimit.
Ndërsa humbjet e jetëve zyrtarisht kanë shkuar në 3,161 persona, ku vlen të theksojmë se raportohen vetëm ata që shtrohen në spitalet Covid.
Megjithëse shumë pranë Kosovës situata e pandemisë nuk është e njëjtë.
Në 24 orët e fundit në të janë shënuar 1 viktimë dhe 12 raste, trend i cili ka qenë i njëjtë prej disa javësh tashmë.
