Punimet shkencore të tre studentëve të Universitetit Europian të Tiranës u përzgjodhën mes 32 më të mirave, nga Fondi Shqiptaro Amerikan i Zhvillimit.
Për të katërtin vit, AADF organizoi “Research Paper Competition – 4th Edition”. Në kuadër të projektit “CleanScore”.
UET mori pjesë me punimet e diplomave të tre studenteve të Fakultetit të Ekonomisë, Biznesit dhe Zhvillimit.
Lorena Gosemi studente e nivelit Master në Financë në Universitetin Europian të Tiranës fitoi edhe vendin e parë në këtë konkurs dhe çmimi i dytë u fitua nga Xhesi Shkreta , studente e nivelit Master në Financë, po në UET. Konkurrentja e tretë nga UET ishte Blerta Molishti, studente Bachelor në Financë, në Universitetin Europian të Tiranës.
Tre studentet konkurruan përballë kolegëve të tyre nga universitete publike dhe private.
Universiteti Europian i Tiranës, i themeluar në 2006 dhe së fundi i velrësuar institucionalisht me notën 10 nga agjencia britanike e sigurimit të cilësisë QAA, ka ndjekur filozofinë për ta pasur në qendër studentin.
Për këtë, sot UET e ka zgjeruar ofertën akademike me programe studimi në pesë fakultete – Humanitete, Edukim e Arte, Ekonomik, Juridik e Shkenca Politike, si Inxhinieri, Arkitekturë, Teknologji Informacioni, si edhe Shkenca Mjekësore Teknike – në ciklin Bachelor, Master e Doktoraturë.
Po ashtu, UET ka fokus të fortë ndërkombëtarizimin, duke përshtatur kurrikulat me dijet më të fundit që kërkon tregu botëror, ofron programe të përbashkëta e diploma të dyfishta në bashkëpunim me universitete prestigjioze europiane dhe sjell për studentët e tij tekstet e shtëpive më të njohura universitare, si Oxfort apo Cambridge, etj. Studentët e UET gjithashtu janë të përfshirë në mënyrë aktive në programet Erasmus+, në shkëmbime studentore në universitete europiane e po ashtu edhe në internshipe të paguara, jashtë vendit. Ata gjithashtu inkurajohen të përfshihen në konferenca shkencore e konkurse, ku shfaqin talentet dhe dijet e përftuara gjatë viteve të studimit, në UET.
Dy studentet fituese, Lorena Gosemi dhe Xhesi Shkreta janë shpallur gjithashtu fituese të vendit të parë e të dytë, respektivisht, për punimet më të mira shkencore në Konferencën Shkencore të Studentëve, DSSH Junior 2021, për Fakultetin e Ekonomisë, Biznesit dhe Zhvillimit.
