Një familje, vajza e së cilës u përdhunua dhe u vra në Katar, i ka shkruar Gareth Southgate dhe skuadrës së Anglisë, për t’i treguar historinë e saj dhe për t’u kërkuar atyre që të nxjerrin në pah ngjarjen gjatë Kupës së Botës.
Nëna e pikëlluar Alison Patterson, 57 vjeçe, tha se do të donte që yjet e futbollit anglez, përfshirë Harry Kane dhe Marcus Rashford, të shkruanin shkronjën e parë të emrit të vajzës së saj Lauren kur të shënojnë një gol.
Lauren po jepte mësim në një shkollë fillore në kryeqytetin Doha kur u zhduk në tetor 2013. Trupi i saj u gjet në shkretëtirë pasi ajo ishte përdhunuar dhe më pas u vra nga Badr Hashim Khamis Abdallah al-Jabr, në një sulm brutal.
Familjes së Lauren iu tha se agresori do të përballej me një dënim me vdekje. Por në vend të kësaj, atij iu dha vetëm dhjetë vjet e gjysmë burg dhe familjes së saj iu ofruan vetëm 250,000 euro kompensim, shifër që thuajse mbulon shpenzimet e tyre ligjore, të udhëtimit dhe të akomodimit deri më tani.
Nëna e tre fëmijëve, Alison ka postuar 27 letra – një për çdo lojtar të Anglisë dhe një për trajnerin e ekipit, Southgate – drejtuar përmes Federatës së Futbollit në adresat përkatëse.
“Dua që të gjithë lojtarët e Anglisë të mendojnë për Lauren kur të dalin në fushë. Nëse vetëm njëri prej tyre do të bënte një formë L-je pasi të shënonte gol ose kur Anglia të fitojë ndeshjen, kjo do të nderonte Lauren dhe do të thoshte kaq shumë”, tha e ëma e viktimës.
Kupat e Botës, Katar 2022, nis më 20 nëntor.
