Një nga shokët e Lear Kurtit, në një lidhje telefonike ekskluzivisht për emisionin “Riview” në Euronews Albania, është shprehur se 32-vjeçarin e ka gjetur të shtrirë në tokë në komisariat. Ai u shpreh se ndaj Lear Kurtit është ushtruar dhunë barbare ndërsa theksoi se policia nuk i ka dhënë ndihmën e parë.
“Kam shkuar në rajon atë natë dhe Learin e kam gjetur të shtrirë në tokë. Para dy javësh Leari ishte në të njëjtën situatë. Fajin e ka të gjithë policia, sepse nuk i ka dhënë ndihmën e parë dhe e dyta ka pasur dhunë. Kanë ushtruar dhunë të tepruar. Learin e kanë goditur në kokë dhe në trup”- u shpreh ai.
Laer Kurti, 32vjeç ndërroi jetë, mbrëmjen e së mërkurës (19 tetor) pasi u shoqërua në komisariatin nr.3 në kryeqytet.
Përmes një njoftimi, Agjencia e Mbikëqyrjes Policore tha se mbrëmjen e 19 tetorit, gjatë patrullimit në Rr. “Riza Çuka” në zonën e Laprakës, efektivët kanë konstatuar Laert Kurtin duke qëndruar përpara një biznesi privat, për të cilin kushtet dhe rrethanat diktonin nevojën e një verifikimi.
Në momentin kur punonjësit e Policisë, i kanë kërkuar dokumentin e identifikimit, Kurti është larguar me vrap, duke mos iu bindur thirrjeve të njëpasnjëshme të punonjësve të Policisë për të ndaluar.
Pasi ka vrapuar për rreth 200 metra, i ndjekur nga patrulla e Policisë, mes rrugicave midis rrugës “Riza Çuka” dhe “Don Bosko”, ai është kapur dhe ndaluar nga punonjësit e Policisë, vend në të cilin kanë qëndruar 7 minuta.
I riu u shoqërua në komisariat dhe hetimi paraprak del në përfundimin se ai humbi jetën për shkak se ka gëlltitur një qese me drogë, për t’ju shmangur kapjes nga policia.
