Shpallja si investitor strategjik e Artan Gaçit ka sjellë përplasje në Kuvend mes ish-kryeminsitrit Sali Berisha dhe Ministres së Mbrojtjes, Olta Xhaçka.
Berisha hodhi akuza ndaj ministres, teksa u shpreh se i ka dhënë tokë në jug bashkëshortit të saj dhe i sugjeroi që do të ishte më mirë të hiqte dorë nga statusi strategjik.
“Bahlkani i Hapur është projekt i Serbisë së madhe, i vasalitetit ndaj Serbisë, mbjell çdo ditë luftë të ftohtë ndaj tre vendeve që nuk e kanë firmosur. Është denoncuar nga BE dhe përfaqësues të lartë të SHBA . Nuk ka asnjë synim tjetër veç se tualeti dhe make up ndaj një njeriu që nuk njeh gjenocidin në Kosovë, Vuçiq. Kjo ishte vetëm një anë, më duhet t’u them zonja, të gjitha keni bashkëshort, por vetëm njëra ka super bashkëshort, strategjik madje, Olta Xhaçka e cila e ka lumturuar me zona në jug, partner strategjik. E nderuar zonjë është mirë me heq dorë nga statusi i burrit strategjik dhe të kesh një burrë si të gjitha”, tha Berisha.
Xhaçka iu përgjigj se bashkëshorti i saj është pronar dhe nuk ka përfituar asnjë centimetër tokë nga shteti.
“Jam krenare për burrin tim, por nuk e di sa krenare është gruaja juaj për ju, por burri im është në tokë të vet dhe s’ka përfituar asnjë cm katror nga shteti ndaj është e turpshme, ua thash kini respekt për veten dhe mos gënjeni siç keni bërë se është turp në këtë moshë”, tha Xhaçka.
Këshilli i Ministrave vendosi dhënien në përdorim të një zone bregdetare në Himarë për resortin “Dreamades Luxury Suites” për një periudhë 30-vjeçare. Sipas këtij vendimi, kompanisë ‘AGTTC Hotel Management’ i jepet leje e përdorimit të brigjeve të detit dhe të zonës përkatëse të plazhit përballë kompleksit, që po ndërtohet në fshatin Gjilekë të bashkisë Himarë. Në vendimin e qeverisë, ‘AGTTC Hotel Management’ sh.p.k, cilësohet si investitor strategjik.
Në Qendrën Kombëtare të Biznesit, QKB, kjo kompani figuron në pronësi të shtetases amerikane, Tawni Lin Grzych-Sutton. Megjithatë, të dhënat e siguruara nga BIRN treguan se kjo kompani është themeluar tre muaj pas vendimit për shpalljen e investitorit strategjik, që ndryshe nga sa sugjeron vendimi i Këshillit të Ministrave, është kompania me emër të ngjashëm, AG.TTC Sh.p.k – në pronësi 100% te ish-deputetit socialist dhe bashkëshortit të ministres së Punëve të Jashtme, Olta Xhaçka.
