Qyteti i Kavajës është tronditur mëngjesin e sotëm nga një ngjarje e rëndë. Pas një sherri, që dyshohet të ketë ndodhur për motive të dobëta, ka mbetur i vrarë një person dhe është plagosur një tjetër, ky i fundit efektiv i policisë së burgjeve. Ngjarja ka ndodhur në lagjen nr.2 të qytetit.
Burime për mediat bëjnë me dije se sherri ka ndodhur për një grua, në banesën e kësaj të fundit, në orët e para pas mesnate. Mendohet se viktima shkoi në shtëpinë e ish-të dashurës pas ndarjes, dhe aty ka nisur një debat.
News 24 raporton se viktima, Dritan Haxholli ka qenë i armatosur dhe ka filluar të kërcënojë vajzën me armë zjarri. Kjo e fundit thuhet se ka lajmëruar një të afërm, Bledar Toçin, i cili kur ka hyrë në banesë, është përballur me të shtëna. Haxholli qëlloi me pistoletë në drejtim të tij, duke e lënë të plagosur.
Polici i burgjeve mësohet se i është kundërpërgjigjur duke e qëlluar me armën e shërbimit, e për pasojë e ka lënë të vdekur në vend.
Pas ngjarjes, i plagosuri Bledar Toçi, i cili punon si polic burgjesh, është dërguar me urgjencë në spitalin e Traumës në Tiranë.
Kavajë/Informacion paraprak
Rreth orës 00.40, në Lagjen nr. 2 Kavajë, shtetasi D. H., banues në Kavajë, ka hyrë në banesën e shtetases M. Q. Në banesë ndodhej dhe shtetasi B. T, banues në Kavajë, punonjës i Policisë së Burgjeve.
Shtetasi D.H. është konfliktuar me shtetasin B. T. dhe si pasojë shtetasi D.H ka qëlluar me armë në drejtim të shtetasit B.T duke e plagosur atë. Shtetasi B.T me armën e shërbimit ka qëlluar në drejtim të shtetasit D.H i cili ka ndërruar jetë në vendngjarje.
Shtetasi B.T, ndodhet jashtë rrezikut për jetën.
Grupi hetimor po vijon punën për sqarimin e mëtejshëm të rrethanave të ngjarjes.