Një ngjarje e rëndë ka ndodhur mesditën e sotme në Tiranë. Një person që mbante në dorë një mjet prerës thikë, është futur brenda në xhaminë “Dine Hoxha” e Rrugës së Kavajës dhe ka plagosur pesë persona.
Të plagosurit janë besimtarë të cilët po kryenin faljen e mesditës brenda në xhami.
Policia ka vënë në pranga si autor të kësaj ngjarje 34-vjeçarin Rudolf Nikolli nga Burreli. Ai është shoqëruar në ambientet e Drejtorisë Vendore të Policisë Tiranë, ku edhe pritet të merret në pyetje për rrethanat e ngjarjes.
Ngjarja ka ndodhur teksa besimtarët po kryenin faljen e mesditës dhe brenda në xhami ndodhej një numër i madh personash. Pesë të plagosurit janë Donald Koçi, rreth 35 vjeç, Saba Peposhi, rreth 22 vjeç, Mariglen Konja, rreth 24 vjeç, Kleon Jaupaj, rreth 26 vjeç dhe Anri Tola, rreth 23 vjeç. Nga sa mësohet ato ndodhen në spital, nën kujdesin e mjekëve, jashtë rrezikut për jetën.
Sulmet ndaj objekteve fetare janë të pazakonta në vendin tonë, ku mbizotëron paqja dhe harmonia fetare mes qytetarëve. Në vendngjarje ka mbërritur grupi hetimor dhe nën drejtimin e Prokurorisë vijon puna për sqarimin e rrethanave dhe dokumentimin e plotë ligjor të ngjarjes.
Rrethanat e ngjarjes mbeten të paqarta, ndërkohë nuk përjashtohet mundësia që autori të jetë me probleme mendore.
Ngjarja ka ndodhur në muajin e shenjtë të ramazanit dhe ka sjellë reagime të shumta. Krerët e Komunitetit Myslim Shqiptar kanë bërë thirrje për zbardhjen e rrethanave të ngjarjes, në mënyrë që të hidhet dritë edhe mbi motivet e autorit.
LEXO EDHE:
Sulmi me thikë në xhami, Ahmed Kalaja: Shpresojmë të mos jetë akt terrorist
Etiketa: Rudolf Nikolli, sulm me thike, tirane, Xhamia Dine Hoxha, Xhamia e Rruges se Kavajes
