Lideri historik i së majtës, Fatos Nano, feston sot ditëlindjen. Ish-kryeministri i Shqipërisë feston 70-vjetorin e lindjes dhe në këtë përvjetor të veçantë, mes shumë urimeve, nuk ka munguar një urim nga pasuesi i tij në parti, Edi Rama.
Kryeministri aktual e ka quajtur Nanon kryetar dhe pjesë të familjes së përbashkët socialiste.
“Edhe 100 kryetari ynë dhe vetëm përpara, me shëndet, humor e harmoni në familjen tënde, po edhe me punë të mira e të tjera fitore në këtë familjen e përbashkët politike, që do të ketë gjithnjë nevojë për mbështetjen e këshillat e tua”, shkroi Rama në mesazhin e tij.
Fatos Nano u zgjodh kryetar i Partisë Socialiste në fillimet e saj, duke e larguar nga e kaluara komuniste dhe transformuar këtë parti sipas modelit të simotrave të saj europiane. Udhëheqja e PS-së nga Nano pati dhe kosto personale, pasi ai u burgos gjatë periudhës kur ishte në opozitë, për t’u shpallur i pafajshëm me ardhjen në pushtet. Nano udhëhoqi PS-në nga viti 1992 deri në vitin 2005, duke ia lënë partinë pas rënies nga pushteti kryetarit dhe kryeministrit aktual, Edi Rama.
Nano si lider gjatë 30 viteve të tranzicionit mbetet modeli i vetëm i dorëheqjes nga partia, pas humbjeve në zgjedhje.
