Kosova dhe Serbia mund të shkojnë drejt një marrëveshje brenda këtij viti. Kështu pretendon presidenti kosovar, Hashim Thaçi. Por siç e ka treguar koha, gjërat nuk janë të lehta në Ballkan. Për të ilustruar terrenin e vështirë ku vendosen gjërat në rajon, AFP ka publikuar detaje nga një restorant serb, i quajtur Korcagin.
Në këtë restorant serviret vetëm ushqim me origjinë nga vendet që nuk e kanë njohur Kosovën. Pronari thotë se është nxitur nga patriotizmi për të ndërmarrë këtë nismë.
Por ndërsa teza për rishikimin e kufijve po artikulohet gjithmonë e më shumë, analisti Andi Bushati shkruan se Edi Rama po luan një lojë të rrezikshme.
“Një intervistë e sinqertë e kryeministrit të Kosovës Ramush Haradinaj për emisionin “T7” ka nxjerë në pah disa të vërteta që Edi Rama mundohet ti’a mbajë të fshehta publikut shqiptar. Me mënyrën e tij, sa bazike po aq edhe të drejtëpërdrejtë në të shprehur, shefi i qeverisë në Prishtinë na ka rrëfyer tre detaje të rëndësishme të darkës që është zhvilluar në shtëpinë e Hashim Thaçit.
E para është një konfirmim zyrtar i asaj që përflitet prej kohësh, se Edi Rama ndryshe nga sa thotë po lobon fuqishëm për një arritje të marëveshjes shqiptaro – serbe përmes obsionit të rrezikshëm të ndarjes etnike dhe të këmbimit të teritoreve. E dyta është se ai po e bën këtë (ndonëse me një mbështetje nga Uashingtoni) në kundërshtim me shtetet më të fuqishme që kanë në dorë përparimin e Shqipërisë drejt BE-së. E treta dhe më e rëndësishmja, se ai po ashtu sikurse Hashim Thaçi, ka fituar tashmë mërinë e kancelares Merkel,” shkruan Bushati tek portali Lapsi.al.
“Tani Edi Rama mund t’a vizitojë Berlinin vetëm si piktor. Por këtu në lojë nuk është fati i tij, por ai i integrimit të Shqipërisë,” vijon Bushati.
