Policia në Tiranë ka vënë në pranga 3 persona, pasi akuzohen se mashtronin shtetas të huaj për të investuar në bursa fiktive.
Të arrestuarit janë administratori i call center Enrik Shehi 29 vjeç dhe dy operatorët Armend Haxhiu, Igli Isufaj.
Gjithashtu, u proceduan penalisht E. S., 25 vjeç, G. R., 22 vjeç dhe A. H., 18 vjeç, të tre banues në Tiranë, të punësuar si operatorë në këtë subjekt.
Nga hetimet rezultoi se 29-vjeçari administronte, në bulevardin “Gjergj Fishta”, një subjekt privat call center, të paregjistruar në organet kompetente.
Si rezultat i operacionit, u sekuestruan, 4 aparate celulare, shuma parash të dyshuara të përfituara nga kjo veprimtari kriminale, si dhe lista me të dhënat e shtetasve të huaj që dyshohet se janë mashtruar për të investuar në bursa fiktive.
Vijon puna për dokumentimin e plotë të kësaj veprimtarie kriminale, identifikimin e personave të tjerë të përfshirë në të, si dhe konfiskimin e aseteve që kanë burim këtë veprimtari kriminale.
