Nga Klodian Tomorri
Po lexoja rastësisht një intervistë të kryetarit të Entit Rregullator të Ujit, Ndriçim Shani. Eshtë një intervistë e botuar në datën 11 janar 2018, në të cilën kreu i ERU-së justifikonte rritjen me 44.4 për qind të tarifës së ujit në Tiranë.
Nuk e di nëse intervista ka qenë e sponsorizuar, por fakti që është botuar në disa gazeta dhe revista njëkohësisht ngre pikepyetje. Megjithatë nuk është ky thelbi.
Pjesa më e rëndësishme e intervistës është justifikimi i rritjes së çmimit. Dhe z. Shani, e ka justifikuar që në titull. Në të gjitha gazetat dhe revistat ku është botuar intervista titulli ka qenë i njejtë: “Tirana, çmimi që duhet paguar për të patur furnizim me ujë 24 orë në ditë”.
Historinë e tarifave e pamë si shkoi. Përmes vendimit të ERU-së, qytetarëve të Tiranës iu moren 1 miliardë e 170 milionë lekë ose 10 milionë euro shtesë në vit. Fatkeqësisht tani po shohim dhe historinë e furnizimit 24 orë në ditë, teksa autobotet dhe bidonat kanë uzurpuar çdo lagje, cep apo pallat të Tiranës.
Sipas raportit vjetor të ERU, pra sipas raportit të pergatitur dhe firmosur nga vet z. Shani, në vitin 2018 koha e furnizimit me ujë të Tiranës ra në 10.1 orë në ditë nga 11.04 orë në ditë që ishte në vitin 2014. Pra vitin e kaluar Tirana kishte 1 orë në ditë më pak uje se sa në vitin 2014.
Në fund të këtij perversiteti, natyrshëm lind një pyetje;
Zoti kryetar i ERU, si të rrihet më në atë karrige?!
Nuk e di nëse vendimi për rritjen e tarifave ka përgjegjësi ligjore. Por a ndjen ti zoti kryetar dhe të gjithë antarët e ERU-së ndonjë përgjegjësi morale, teksa në Tiranë po përhapen epidemi nga mungesa e ujit?
Vetëm një ditë më parë ishin mbi 250 veta të shtruar ne urgjencë dhe tashmë të gjitha autoritetet shëndetesore dyshojnë se shkaku i epidemisë është mungesa e ujit, edhe pse kanë frikë ta thonë me zë të lartë në publik.
Të gjithë këta po paguajnë 10 milione euro në vit më shume nga vendimi yt. Dhe ne vend të ujit 24 ore po marrin sëmundjet.
Çoji të ndenjurat nga karrigia zotëri. Eshtë minimumi i përgjegjesisë që mund të marrësh para atyre qytetarëve me bidona në dorë dhe atyre që po zenë shtreterit e spitaleve nga epidemitë.
