Ditën e djeshme datë 26 tetor 2021, Komisioni për Ekonominë dhe Financat miratoi projektligjin “Për miratimin e buxhetit faktik të vitit 2020”, ku raportoi ministrja e Financave, Delina Ibrahimaj dhe nga ana tjetër kreu i Kontrollit të Lartë të Shtetit, Arben Shehu, raportoi për menaxhimin e fondeve publike gjatë vitit pandemik 2020.
Pavarësisht gjetjeve të relatuara nga Kryetari i KLSH-së, kryesisht mbi shkeljet ligjore në lidhje me rishikimet buxhetore gjatë vitit 2020, raporti u konsiderua jo plotësisht i realizuar nga deputetët e opozitës dhe vecanërisht deputeti socialist, Erion Braçe i cili citoi se ky raport duhet të ishte i fokusuar në certifikimin e treguesve fiskalë të paraqitur nga Ministria e Financave dhe Ekonomisë dhe jo në paraqitjen e gjithë veprimtarisë audituese të institucionit.
Raporti i KLSH-së u kritikua dhe nga deputetja demokrate, Jorida Tabaku, e cila tha se priste nga ky raport një analizë mbi kontratat koncesionare të qeverisë –veçanërisht për performancën e impianteve të mbetjeve urbane.
Kreu i Kontrollit të Lartë të Shtetit, Arben Shehu në fjalën e tij u shpreh me vendosmëri dhe theksoi se cdo shkelje e konstatuar do të vlerësohej edhe për karakterin e vet penal, duke vijuar procedurat në organet kompetente , kryesisht në SPAK.
Ky qëndrim nga ana e kreut të Kontrollit të Lartë të Shtetit, gjeti kundërshtim nga z.Braçe i cili u kundërpërgjigj duke rikujtuar rolin e Kontrollit të Lartë të Shtetit, si institucion suprem auditimi që ka për mision informimin e publikut dhe Kuvendit të Shqipërisë në lidhje me përdorimin e burimeve me ekonomicitet, efektivitet dhe efiçiencë nga pushteti qendror dhe lokal dhe nga njësi të tjera publike, në përputhje me praktikat me të mira të BE e me standardet ndërkombëtare, dhe jo në vetvete karakterin dhe qasjen penale, pasi kjo është kompetencë e organeve të tjera.
Seanca në Komisionin e Ekonomisë dhe Financave vijoi disa orë me diskutime. Si përfundim komisioni e miratoi vetëm me votat e mazhorancës buxhetin faktik të qeverisë për vitin 2020 duke lënë pas një pikëpyetje të madhe mbi veprimtarinë e KLSH-s gjatë vitit 2020 nën drejtimin e z.Shehu.
