Ambasada amerikane në Tiranë, ka njoftuar sot për vizitën që bën pasnesër në vendin tonë, zyrtari i lartë amerikan, Gabriel Escobar.
Ambasada bën të ditur se me kë do të takohet i dërguari i posaçëm për Ballkanin Perendimor, dhe shkëput një pjesë të mesazhit, që është vendosmëria e SHBA në luftën ndaj korrupsionit, dhe minimit të demokracisë.
“Më 9 dhjetor, Zëvendës Ndihmës Sekretari i Shtetit i SHBA për Çështjet Europiane dhe Euroaziatike dhe i Dërguari i Posaçëm për Ballkanin Perëndimor Gabriel Escobar do të zhvillojë vizitën e tij të parë në Shqipëri, me qëllimin për të thelluar miqësinë tonë të ngushtë, e mbështetur në vlerat e përbashkëta demokratike. Escobar do të takohet me Kryeministrin Rama, Ministren e Jashtme Xhaçka, Kryetarin e Partisë Demokratike Basha dhe udhëheqës të tjerë për të rikonfirmuar mbështetjen e palëkundur të Shteteve të Bashkuara për demokracinë e Shqipërisë, integrimin në BE, bashkëpunim më të fortë në mbrojtje dhe mundësi për tregti e investime. Ashtu siç shkruhet në Urdhrat Ekzekutivë të Presidentit Biden, Escobar do të diskutojë gjithashtu edhe mbi vendosmërinë e Shteteve të Bashkuara për të luftuar korrupsionin, pandëshkueshmërinë dhe përpjekjet për të minuar demokracinë në Ballkanin Perëndimor”, shkruhet në njoftimin e ambasadës së SHBA në Tiranë.
