Kryeministri i Malit të Zi, Dritan Abazoviç ka reaguar pas aksionit të policisë, që vuri në pranga kryetarin e Gjykatës Ekonomike, Blaz Jovanic.
Abazoviç tha se policia ishte e njëjtë si më parë, por prokurorët ishin të ndryshëm, gjë që dha rezultate.
“Unë mendoj se e ashtuquajtura mafia e falimentimit ka zënë vend dhe i ka shkaktuar dëme të mëdha shtetit dhe se ky është një fillim i mirë”, tha Abazovic, i cili ishte përgjegjës për koordinimin e shërbimeve të sigurisë në vitin e kaluar.
Sipas tij, tani është koha për të larë hesapet dhe secili është përgjegjës për atë që ka bërë, transmeton Podgorica News.
“Përgjigja më e mirë ndaj pohimeve për mungesën e luftës kundër krimit të organizuar dhe korrupsionit duhet të jetë si kjo e fundit. Le të flasin rezultatet, gjithçka tjetër është politikë. Pres që ky trend të vazhdojë”, deklaroi më tej Kryeministri.
Jovanic u arrestua me urdhër të kryeprokurorit të ri të posaçëm Vladimir Novovic, nën dyshimin e organizimit të një grupi kriminal dhe shpërdorimit të detyrës.
Gjatë blicit policor u ndaluan edhe edhe disa persona të tjerë nga disa qytete malazeze. Abazovic e ka bërë të qartë se lufta kundër korrupsionit dhe nepotizmit do të jetë një nga prioritetet kryesore të ekzekutivit që ai drejton.
Qeveria e tij e pakicës mori dritën jeshile të parlamentit malazez në fund të prillit.
