Nuk zgjidhet kjo punë me të thirrura në mes të qytetit dhe me skeçe estradash a thiatrosh kur teatër nuk ka më prej dekadash, tani as ndërtesë teatri!
Në vend të debatit për shkollim, sherri nëse ndërhyn apo jo BE në fushatat elektorale kur debatohet për shkollimin!!!
(O Zot na mbro!)
Që të trajtosh një reformë të qartë dhe të saktë për arsimin parauniversitar dhe universitar, kjo bëhet pasi të jenë zgjidhur dhe dhënë përgjigje shkencërisht disa pyetjeve. Përgjigje jo ideologjike, politike, sepse ato nuk janë përgjigje, janë slogane, por përgjigje bazuar në të dhëna të arsyetuara saktë.
Unë dalloj katër pika fillestare:
1. Ku do të duam ta çojmë zhvillimin ekonomik, social, kulturor të Shqipërisë në së paku njëzet vitet e ardhshme. Përpunimi i modelit imagjinar i Shqipërisë të vitit 2050 është urgjeeeeent të përpunohet qysh tani. Ndryshe rrahim kot ujë në havan.
2. Cilat janë profesionet në shoqërinë shqiptare të dekadave që vijnë për të orientuar edukimin dhe formimin kulturor, shkencor, dhe profesional të të rinjve shqiptarë. Nuk mundet që universitetet të vazhdojnë të japin dije që i riu dhe e reja duhet t’i marrin që në shkollën nëntëvjeçare apo në gjimnaz. Nuk mësohet për shembull gjuha e huaj në moshën e universitetit.
3. Në çfarë mënyre do të organizohet shkollimi, si do të menaxhohen shkollat dhe universitetet që ato të mos jenë viktimat e përhershme të politikës dhe të ministrive burokratiko-propagandistike që e kanë shkatërruar formimin shkencor dhe mësimdhënien si edhe kërkimin shkencor. Mos na tregojë politika se si do të jenë dijet në shkollë, por të na japë ligje që të mundësojnë që shkollat dhe universitetet ta gjejnë vetë ato rrugën që duhet për të dhënë dijet që duhen. Ministrisë i ka ikur përsëri nga dora ajo që ndodh. Janë rikthyer Kristalet, më keq seç ishin. Doni prova? Më thirrni në gjyq se ju jap pa fund!
4. Pa krahasuar me botën se çfarë quan bota njeri të kulturuar, as mund të bëhet fjalë për sistem dijesh dhe kulture në Shqipëri.
Ja katër parimet bazë që na ndihmojnë për të menduar. Ndryshe, hajde të dëgjojmë propaganda shurdhuese mbi shkollën.
Ne vend të debatojë politika për arsimin dhe shkencën, si ta çlirojmë nga vargonjtë e burokracisë dhe politikës, debati bëhet nëse debati është një ndërhyrje e BE në fushatat elektorale të sotme apo jo!
Çfarë trishtimi i tmerrshëm! Harrojmë që një shkollim i keq është më shumë se një vrasje masive jetësh të rinjsh në dekadat e ardhshme, më keq se Covid.