Euro ra nën 0.99 dollarë këtë të hënë, niveli më i ulët në 20 vjet. Rënia erdhi si pasojë e njoftimit që u bë javën e kaluar se Rusia do të ndërpresë furnizimet e gazit në Gjermani nëpërmjet tubacionit Nord Stream.
Euro ra 0.70 për qind në 0.9884 dollarë këtë të hënë në orën 05:35 GMT, më e ulëta që nga dhjetori 2002.
Monedha evropiane ka vazhduar të dobësohet kundrejt dollarit që nga fillimi i këtij viti, e goditur nga turbulencat ekonomike dhe pasiguritë e shkaktuara nga pushtimi rus i Ukrainës .
Gjigandi rus i gazit Gazprom tha të premten se tubacioni Nord Stream do të mbetet i mbyllur për një kohë të pacaktuar .
Ai tha se kishte zbuluar “rrjedhje vaji” në një turbinë gjatë një operacioni të planifikuar të mirëmbajtjes tre-ditore dhe se tubacioni do të qëndronte i mbyllur derisa të riparohej.
Pas vendosjes së sanksioneve ekonomike për pushtimin e Ukrainës nga Kremlini, Rusia ka reduktuar ose ndërprerë furnizimet për vende të ndryshme evropiane, duke shkaktuar rritje të çmimeve të energjisë.
