Belgjika dhe Holanda janë bërë qendra kryesore për trafikun e kokainës në Europë, tha të martën agjencia policore e Bashkimit Evropian – Europol.
Në një raport prej 27 faqesh, të publikuar bashkë me Zyrën e Kombeve të Bashkuara për Krim dhe Drogë, Europol tha se bandat kriminale përdorin qytetet porte të Roterdamit, Hamburgut dhe veçanërisht Antverpin për të transportuar drogën në Holandë, nga ku shpërndahet pastaj në të gjithë Europën.
Kjo ka bërë që Spanja të kapërcehet si rrugë kryesore e kontrabandës, tha agjencia Europol. Sipas saj, vetëm vitin e kaluar, në Antverp të Belgjikës u kapën rreth 65.6 tonë kokainë.
Në shkurt, Gjermania dhe Belgjika kapën bashkërisht 23 tonë – një sasi kjo që u cilësua si rekorde. Në raport thuhet se tregu i kokainës në Europë u rrit kryesisht me furnizimet e shtuara nga Kolumbia, ku një marrëveshje e paqes me grupin gueril FARC, e arritur në vitin 2016, ka hapur tregun për konkurrencë.
Raporti po ashtu thekson se bandat europiane të drogës shpesh operojnë përgjatë vijave familjare, etnike ose gjuhësore, “duke përfshirë bandat marokene dhe shqiptare”, si dhe “grupin mafioz Ndrangheta të Italisë”.
Pas kanabisit, kokaina tani është droga e dytë më e popullarizuar në Europën Perëndimore dhe Qendrore, thuhet në raport.
Vlerësimet e fundit sugjerojnë se vitin e kaluar kanë qenë rreth 4.4 milionë përdorues të saj.
Etiketa: Belgjika, droga, Europë, Europol, holanda, kokaina, Ndragheta, Raporti, Shqiperia
