Faqja zyrtare e Eurovisionit e ka fshirë nga rrjetet sociale fotografinë nga prova e performancës së këngëtares shqiptare, Ronela Hajati.
Këngëtarja, e cila do të performojë e para në festivalin e muzikës europiane, ishte po ashtu ajo që nisi e para provat zyrtare.
Faqja zyrtare e festivalit shpërndau fillimisht një galeri fotosh nga performanca, por më pas e fshiu postimin duke e ripostuar pa njërën prej fotove.
Për ngjarjen ka reaguar edhe Eurovision Albania, një faqe dedikuar festivalit dhe që mban të përditësuar ndjekësit me zhvillimet e fundit, por ende nuk ka ndonjë sqarim mbi atë që ndodhi.
“Duke qenë se Ronela Hajati çeli provat, fotografitë e saj ishin të parat që u shfaqën të shtunën në mesditë duke marrë vëmendjen kudo, në Twitter dhe Instagram. Konkretisht, fotoja kryesore (e publikuar në krye të postimit), shfaqte Ronelën me katër balerinët e saj me duart duke lëvizur gjatë performancës drejt pjesës së poshtme të trupit. Mesditën e së dielës galeria e fotove të Ronelës u hoq nga llogaria zyrtare e Eurovizionit në Instagram. Më pas u ripostua, por pa foton e parë. Nuk është dhënë asnjë shpjegim dhe Shqipëria ishte i vetmi vend të cilit iu hoq postimi dhe u rihodh më vonë”, shkruan @eurovisionalbania në Instagram, një faqe dedikuar festivalit.
Thuhet se ekipit shqiptar i është kërkuar të ndryshojë koreografinë pas provave të djeshme, pasi konsiderohet sipas tyre si shumë provokative, teksa nuk ka ende një reagim zyrtar.
Pas “censurimit” të fotove të marra gjatë provave zyrtare ka ardhur edhe një reagim i këngëtares në Twitter. Ajo ka postuar disa emoji duke qarë e ka lënë të kuptohet që është mjaft e mërzitur nga kjo situatë.
