Kujtim Fejzullahi, 20-vjeçari shqiptar që sulmoi në emër të ISIS, lagjen më të frekuentuar të Vjenës, dy netë më parë.
Hapat e parë në jetë, Fejzullahi i nisi si futbollist në një klub austriak ku mendohej se kishte të ardhme. Familja kishte pritshmëri se ai do të ndiqte rrugën e idhujve të futbollit. Por në fakt, rezultoi e kundërta.
Gazetari austriak, Florian Klenk, ka thënë se duhet të jepet përgjigje se si Kujtim Fejzullai nga një futbollist i dashur në një klub austriak ishte shndërruar në një ekstremist e sulmues terrorist.
“Për mua, një pyetje mbetet: Pse një njeri që ishte duke luajtur në një klub të Vjenës ishte radikalizuar për ca vite dhe ka ekzekutuar katër persona. Çfarë ndodhi ? Kjo është një çështje që kërkon hetim”, ka shkruar Florian Klenk.
Fejzullai më 13 qershor të vitit 2015 ishte regjistruar si futbollist në një klub austriak, por kjo kishte zgjatur shumë pak kohë, pasi ai mori rrugë krejtësisht të gabuara duke u indoktrinuar nga rrymat ekstremiste të islamit radikal.
Madje 20-vjeçari në vitin 2019-të ishte përpjekur t’i bashkohej organizatës terroriste ISIS në Siri, dhe për këtë ishte dënuar me 22 muaj burg, por ishte liruar para se t’i përfundonte dënimi.
Familjarët thonë se kohët e fundit 20-vjeçari shoqërohej me persona të rrezikshëm, pjesë të islamit ekstrem, të cilët edhe e kanë radikalizuar duke e përgatitur për sulme terroriste të përgjakshme ndaj vendeve të Europës Perëndimore.
Kujtim Fejzullai akuzohet se ka vrarë 4 persona dhe ka plagosur 22 të tjerë mbrëmjen e 2 nëntorit, përpara se të ekzekutohej nga policia vjeneze. 7 prej të plagosurve po luftojnë ende me vdekjen në spital. Kjo ishte goditja më e ashpër e terrorizmit në zemër të Austrisë. Vala e terrorit erdhi pas disa sulmeve në Francë, të nxitura edhe nga qëndrimet e presidentit frances, Macron ndaj islamit dhe profetit Muhamed.
