Byroja Federale e Hetimit thotë se ka zbuluar një komplot terrorist për të vrarë ish-presidentin Xhorxh W. Bush, në shenjë hakmarrjeje për luftën në Irak.
Shihab Ahmed Shihab, një azilkërkues irakian, i zbuloi planin një informatori të infiltruar të FBI-së, i cili gjithashtu e çoi të dyshuarin nëpër Dallas, për të mbikëqyrur shtëpinë dhe zyrat e Bushit.
Komplotuesit “dëshironin të vrisnin ish-presidentin Bush sepse mendonin se ai ishte përgjegjës për vrasjen e shumë irakianëve dhe copëtimin e të gjithë Irakut”, tha në dosje agjenti special i FBI-së, John Ypsilantis, një anëtar i Task Forcës së Përbashkët të Terrorizmit në Cincinnati.
Katër shtetas irakianë, dy prej të cilëve ishin ish-agjentë të inteligjencës, do të futeshin kontrabandë në SHBA nga Turqia, Egjipti dhe Danimarka, si pjesë e komplotit, tha agjenti i FBI-së. Plani përfshinte futjen e tyre në Meksikë dhe më pas kalimin e kufirit në Teksas.
Megjithëse Shihab nuk ishte anëtar i grupit militant të Shtetit Islamik, në urdhër-arrest thuhet se ai ofroi “mbështetje materiale për një organizatë të caktuar terroriste të huaj, veçanërisht ISIS”.
Shihab i kërkoi informatorit detaje rreth nivelit të sigurisë në shtëpinë e Bushit në Dallas dhe Crawford, tha agjenti i FBI. Në shkurt, informatori e mori Shihabin në aeroportin në Dallas dhe e ndihmoi atë ndërsa përdorte telefonin e tij për të regjistruar video të shtëpisë së Bushit, si dhe bibliotekës dhe zyrave në Institutin George W. Bush, sipas dosjes.
Shihab dyshohet se i tha informatorit “se ai donte të përfshihej në sulmin dhe atentatin aktual” dhe se “nuk i interesonte nëse vdiste, pasi do të ishte krenar që ishte përfshirë”. Ai gjithashtu pyeti se si të merrte simbole të rreme të FBI-së ose policisë, tha agjenti i FBI-së.
Bush javën e kaluar ringjalli polemika mbi luftën, kur ai pa dashje tha fjalën “Irak” në vend të fjalës “Ukrainë”, ndërsa kritikoi presidentin rus Vladimir Putin për një “pushtim tërësisht të pajustifikuar dhe brutal”./Përshtati Liberale.al
