Zbardhen detaje të reja dhe kronologjia e ngjarjes në Jug të vendit që kulmoi me një incident mes pushuesit dhe pronares së një hoteli që në bashkëpunim me një tjetër person terrorizuan familjen në Himarë duke i dalë përpara makinës, ndërsa fëmija nuk pushonte së qari.
Si ndodhi ngjarja?
Visar Mato së bashku me familjen pretendon se kishte prenotuar për disa ditë një dhomë në hotelin e Ektarina Joshit 53-vjeçe në Livadh, por ka qëndruar vetëm ditën e parë dhe më pas ka vendosur të largohet pasi nuk i ka pëlqyer shërbimi.
Mato pagoi vetëm natën për të cilën qëndroi, por duket se kjo gjë nuk i ka pëlqyer pronares së hotelit dhe këtu ka nisur konflikti. Sipas tij, pronarja e hotelit nuk e ka pranuar këtë fakt duke kërkuar pagesë për të gjitha ditët dhe duke mos e lejuar të largohet, ndërsa më pas janë pamjet që tregojnë si vazhdoi rrjedhja e ngjarjes.
Pushuesi ka bërë denoncim se pronarja së bashku me një tjetër person nuk e lejuan të largohet para kohe, pasi sipas tij duhet të bënte pagesën e plotë, ndërsa në kallëzim pretendon se i dëmtoi pronën, konkretisht orenditë. Prokuroria ka marrë denoncimin dhe çështja ka kaluar për hetim.
Sipas njoftimit zyrtar “specialistët për Hetimin e Krimeve në Komisariatin e Policisë Himarë referuan materialet në prokurori për veprën penale “Shkatërrimi i pronës” në ngarkim të Visar Mato 42-vjeç, pasi ka bërë kallëzim pronarja e hotelit Ektarina Joshi 53 vjeçe se Mato i ka dëmtuar pronën e saj në Livadh, Himarë“.
Ngjarja e sotme është një tjetër skenë jo pozitive në imazhin e turizmit në Shqipëri pas asaj të Mihal Kokëdhimës në 2019.
LEXO EDHE:
Pronarët e hotelit terrorizojnë familjen në Himarë, i dalin para makinës
